რუსული კანონის გაუქმებაზე ზურაბიშვილის კონსტიტუციური სარჩელი ყაველაშვილმა უკან გაიწვია

ყაველაშვილის ადმინისტრაციის მიერ გავრცელებულ განცხადებაშია ნათქვამია, რომ „უცხოური გავლენის გამჭვირვალობის შესახებ“ კანონი „ეფუძნება გამჭვირვალობასა და ანგარიშვალდებულებას“, რაც ხელს უწყობს „სახელმწიფოს ეროვნული სუვერენიტეტის დაცვასა და ქვეყნის სტაბილურ განვითარებას“.

„კანონი ემსახურება საზოგადოების მაქსიმალურად ინფორმირებას უცხოური ძალის ინტერესების გამტარებელი ორგანიზაციების დაფინანსების წარმომავლობის შესახებ. შესაბამისად, საქართველოს პრეზიდენტმა მიხეილ ყაველაშვილმა მიიღო საკონსტიტუციო სარჩელზე უარის თქმის გადაწყვეტილება“, – ნათქვამია განცხადებაში.

სალომე ზურაბიშვილმა საკონსტიტუციო სასამართლოს სარჩელით 2024 წლის ივლისში მიმართა, რადგან მიაჩნდა, რომ კანონის არაერთი ნორმით საქართველოს კონსტიტუციით გარანტირებული რიგი ძირითადი უფლებები ირღვევა, ხოლო მთლიანად კანონი წინააღმდეგობაში მოდის კონსტიტუციის 78-ე მუხლთან, რომლის მიხედვითაც კონსტიტუციურმა ორგანოებმა თავიანთი უფლებამოსილების ფარგლებში უნდა მიიღონ ყველა ზომა ევროკავშირსა და ნატოში ქვეყნის სრული ინტეგრაციის უზრუნველსაყოფად.

მეხუთე პრეზიდენტი რუსული კანონის მოქმედების შეჩერებას და მის საბოლოო გაუქმებას ითხოვდა. ამავე მოთხოვნებით საკონსტიტუციო სასამართლოში კიდევ სამი სარჩელი შევიდა.

2024 წლის ოქტომბერში, საკონსტიტუციო სასამართლომ ოთხივე კონსტიტუციური სარჩელი ნაწილობრივ არსებითად განსახილველად მიიღო. ამავე დროს, 6 ხმით 2-ის წინააღმდეგ, სასამართლომ რუსული კანონის მოქმედება არ შეაჩერა. ამ საკითხზე განსხვავებული აზრი ჰქონდათ გიორგი კვერენჩხილაძესა და თეიმურაზ ტუღუშს.

რუსული კანონი ადამიანის უფლებათა ევროპულ სასამართლოშია გასაჩივრებული.