„აზერბაიჯანის ავიახაზების“ თვითმფრინავი, რომელიც ყაზახეთში ჩამოვარდა და შედეგად 38 ადამიანი დაიღუპა, რუსულმა საჰაერო თავდაცვამ ჩამოაგდო. Euronews-ის შემდეგ ამ ინფორმაციას სააგენტო Reuters-ი ავრცელებს, რომელიც ოთხ წყაროს ეყრდნობა.
ახალი ამბები
მკითხველის რჩეული
- 1 „რეპრესიები რეორგანიზაციის სახელით“ - თელავის უნივერსიტეტიდან 5 პროფესორი გაათავისუფლეს
- 2 რიჟვაძის საქმეზე საზღვაო ტრანსპორტის სააგენტოს დირექტორი ალექსი ახვლედიანი დააკავეს
- 3 პაპუაშვილი არჩევნებზე წალენჯიხის მერიის განცხადებას „საბოტაჟს“ უწოდებს
- 4 თავდაცვის ყოფილი მინისტრის მოადგილე და ნათესავი დააკავეს 1.3 მლნ-ის გაფლანგვის ბრალდებით
- 5 ნათესავებმა თბილისში იპოვეს ჩეჩნეთიდან ოჯახში ძალადობას გამოქცეული ქალი და მისი წაყვანა სცადეს
- 6 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
ერთ-ერთი აზერბაიჯანული წყაროს ცნობით, გამოძიების პირველადი შედეგები აჩვენებს, რომ თვითმფრინავი რუსულმა „პანცირ ს“-ის საჰაერო თავდაცვის სისტემამ ჩამოაგდო. წყაროს ინფორმაციით, თვითმფრინავის კომუნიკაცია ელექტრონული ომის სისტემებით პარალიზებული იყო გროზნოსთან მიახლოებისას.
„არავინ ამბობს, რომ ეს განზრახ მოხდა. თუმცა, დადგენილი ფაქტების გათვალისწინებით, ბაქო მოელის, რომ რუსული მხარე აღიარებს აზერბაიჯანული თვითმფრინავის ჩამოგდებას“, – განაცხადა წყარომ.
Reuters-ის სამმა სხვა წყარომ დაადასტურა, რომ აზერბაიჯანის მიერ წარმოებული გამოძიება ამ პირველად დასკვნამდე მივიდა.
სამგზავრო თვითმფრინავმა, რომელიც 25 დეკემბერს აზერბაიჯანის დედაქალაქ ბაქოდან რუსეთში, ჩეჩნეთის დედაქალაქ გროზნოში მიფრინავდა, კურსიდან ასობით კილომეტრით გადაუხვია, კასპიის ზღვას გასცდა და ყაზახეთის ქალაქ აქთაუში ჩამოვარდა.
რუსეთის საავიაციო სამსახურის განცხადებით, ავარიის მიზეზი, შესაძლოა, ფრინველებთან შეჯახება ყოფილიყო. ოფიციალურმა პირებმა არ განმარტეს, რატომ გადაკვეთა თვითმფრინავმა ზღვა.
რუსეთის თავდაცვის სამინისტრომ Reuters-ის შეკითხვები უპასუხოდ დატოვა, კრემლის პრეს-სპიკერმა, დმიტრი პესკოვმა კი მედიასთან განაცხადა, რომ გამოძიების დასრულებამდე „ჰიპოთეზების აგება არასწორია“.
მანამდე, ინფორმაცია იმის შესახებ, რომ „აზერბაიჯანის ავიახაზების“ სამგზავრო თვითმფრინავის ჩამოვარდნის მიზეზი რუსული რაკეტა გახდა, Euronews-მა აზერბაიჯანის მთავრობაში საკუთარ წყაროებზე დაყრდნობით გაავრცელა. გამოცემა წერდა, რომ რაკეტა თვითმფრინავის მიმართულებით იმ დროს გაისროლეს, როდესაც გროზნოს თავზე უპილოტო საფრენი აპარატების აქტივობა იყო. ის თვითმფრინავის მახლობლად აფეთქდა და მისი დაზიანება გამოიწვია. თვითმფრინავს ავარიული დაშვების ნებართვა რუსეთის არცერთ აეროპორტში არ მისცეს და კასპიის ზღვის გავლით აქთაუს მიმართულებით გაფრენა მიუთითეს.
Embraer 190-ის ბორტზე სულ 67 ადამიანი იმყოფებოდა - 62 მგზავრი და ეკიპაჟის 5 წევრი. მათგან 38 დაიღუპა. აზერბაიჯანის ჯანდაცვის სამინისტროს მონაცემებით, დაღუპულთაგან 25 აზერბაიჯანის მოქალაქე იყო.
