აშშ-მა სანქციები დაუწესა ორ მსხვილ რუსულ ნავთობკომპანიას, „როსნეფტსა“ და „ლუკოილს“

„შეერთებული შტატები გააგრძელებს ომის მშვიდობიანი გზით მოგვარების ადვოკატირებას. მუდმივი მშვიდობა მთლიანად დამოკიდებულია რუსეთის მზადყოფნაზე, კეთილსინდისიერად აწარმოოს მოლაპარაკებები“, - ნათქვამია ხაზინის დეპარტამენტის განცხადებაში.

დეპარტამენტის ხელმძღვანელმა, სკოტ ბესენტმა დაამატა, რომ მზად არიან, საჭიროების შემთხვევაში, მიიღონ დამატებითი ზომები კონფლიქტის მოგვარებლად პრეზიდენტ დონალდ ტრამპის მცდელობების მხარდაჭერისთვის. მან ასევე მოუწოდა აშშ-ის მოკავშირეებს, შეუერთდნენ ამ სანქციებს და უზრუნველყონ მათი აღსრულება.

აშშ-მ უცხოურ ნავთობგადამამუშავებელ ქარხნებს რუსულ კომპანიებთან გარიგებების დასასრულებლად 21 ნოემბრამდე მისცა ვადა. სანქციები გავრცელდება „ლუკოილისა“ და „როსნეფტის“ იმ შვილობილ კომპანიებზეც, სადაც ისინი 50%-იან წილს ან მეტს ფლობენ.

ხაზინის დეპარტამენტის გადაწყვეტილების კომენტირებისას, ტრამპმა ხაზგასმით აღნიშნა, რომ აშშ „ძალიან დიდხანს ელოდა“ მოსკოვისგან საპასუხო ნაბიჯებს. მან დაუშვა, რომ კონფლიქტი მალე მოგვარდება და შეზღუდვები მოიხსნება.

ერთი კვირით ადრე, „როსნეფტსა“ და „ლუკოილს“ სანცქიები გაერთიანებულმა სამეფომ დაუწესა. მაშინ რუსეთის პრეზიდენტის პრესმდივანმა დიმიტრი პესკოვმა განაცხადა, რომ რუსეთის ეკონომიკა „უზარმაზარი შეზღუდვების პირობებში ფუნქციონირებს“ და შესაბამისად, საქნქციების მიმართ უკვე „გარკვეული იმუნიტეტი“ აქვს გამომუშავებული.

Bloomberg-ის შეფასებით, სახელმწიფოს მიერ კონტროლირებად კომპანია „როსნეფტზე“, რომელსაც პრეზიდენტ ვლადიმერ პუტინის ახლო მოკავშირე, იგორ სეჩინი ხელმძღვანელობს და კერძო კომპანია „ლუკოილზე“ ქვეყნის მთლიანი ნავთობის ექსპორტის თითქმის ნახევარი მოდის. ეს ორი კორპორაცია ერთად, დღეში 3.1 მილიონი ბარელი ნავთობის ექსპორტს ახორციელებს.

საქართველოში მოქმედი „ლუკოილის“ (შპს „ლუკოილ-ჯორჯია“) 100%-იან წილს ავსტრიაში რეგისტრირებული LUKOIL International GmbH ფლობს. აღნიშნული კომპანია, თავის მხრივ, რუსულ „ლუკოილს“ ეკუთვნის.