ღარიბაშვილის, ლილუაშვილის და ფარცხალაძის სახლებში ჩხრეკა ჩატარდა

პროკურატურაში გამართულ ბრიფინგზე გვარაკაძემ თქვა, რომ „განსაკუთრებით მაღალი საზოგადოებრივი ინტერესიდან და სისხლის სამართლის საქმეების მნიშვნელობიდან გამომდინარე“, მსურს საზოგადოებას შემდეგი ინფორმაცია მიაწოდოს:

„საქართველოს გენერალური პროკურატურის საგამოძიებო ნაწილში, სახელმწიფო უსაფრთხოების სამსახურის ანტიკორუფციულ და სახელმწიფო უსაფრთხოების დეპარტამენტებში, სხვადასხვა სისხლის სამართლის საქმეზე მიმდინარე გამოძიების ფარგლებში, დღეს დილის 10 საათიდან, მთელი ქვეყნის მასშტაბით, ერთდროულად, ჯამში 22 ლოკაციაზე, მასშტაბური ღონისძიება ჩატარდა.

ერთობლივი ღონისძიების ფარგლებში, განხორციელდა საქართველოს ყოფილი პრემიერ-მინისტრის - ირაკლი ღარიბაშვილის, სახელმწიფო უსაფრთხოების სამსახურის ყოფილი უფროსის - გრიგოლ ლილუაშვილის, ყოფილი მთავარი პროკურორის - ოთარ ფარცხალაძის და მათთან დაკავშირებული, სულ 8 პირის საცხოვრებელი ბინების/სახლების და პირადი ჩხრეკები.

ამოღებულია სხვადასხვა ელექტრონული მოწყობილობა, დოკუმენტაცია და დიდი ოდენობით ფულადი თანხა. ხსენებულ საქმეებზე აქტიურად ტარდება საგამოძიებო, საპროცესო და ოპერატიულ-სამძებრო ღონისძიებები“, – განაცხადა გვარაკიძემ.

ამ საკითხზე სახელმწიფო უსაფრთხოების სამსახურს ინფორმაცია არ გაუვრცელებია.

ირაკლი ღარიბაშვილი მედიასთან ბოლოს 4 ოქტომბერს გამოჩნდა, როდესაც ადგილობრივი თვითმმართველობის არჩევნებში მისცა ხმა. „საცოდავები ხართ. თქვენ ხართ მთავარი „ფეიკერები“ და მატყუარა ტელევიზიები“, - ასე უპასუხა მან ჟურნალისტის კითხვას, ელოდება თუ არა დაპატიმრებას.

ბოლო თვეებია, ოპოზიცია ავრცელებს ინფორმაციას, რომ ირაკლი ღარიბაშვილსა და გრიგოლ ლილუაშვილს პასპორტები აქვთ ჩამორთმეული, რათა ქვეყანა არ დატოვონ. თავად მათ ამ საკითხზე კომენტარი არ გაუკეთებიათ.