თეატრალური უნივერსიტეტის რექტორმა პროტესტის მონაწილე სტუდენტებს სტატუსი აღუდგინა

„სტუდენტების, პედაგოგებისა და თანამშრომლების განცხადებების საფუძველზე, უნივერსიტეტის საუკეთესო ინტერესებიდან გამომდინარე, რექტორმა მიიღო გადაწყვეტილება არ გამოიყენოს სტუდენტების მიმართ დისციპლინური პასუხისმგებლობის უკიდურესი ზომა - სტატუსის შეწყვეტა“, – ვკითხულობთ თეატრალური უნივერსიტეტის Facebook-გვერდზე გამოქვეყნებულ განცხადებაში.

მანამდე აღნიშნული გადაწყვეტილების შესახებ ინფორმაცია „ქართული ოცნების“ კულტურის მინისტრის მოადგილემ, ბექა დავითულიანმა გაავრცელა. დავითულიანის შეფასებით, რექტორმა „მიიღო სწორი გადაწყვეტილება“ და სტუდენტებს „მისცა უკანასკნელი გაფრთხილება, რითაც ამოწურა ეს საკითხი, დახურა ყოველგვარი სივრცე პოლემიკისთვის“.

„[გიორგი შალუტაშვილმა] მისცა შესაძლებლობა თავის სტუდენტებს, ურთიერთობა სტუდენტებსა და რექტორს შორის დაუბრუნდეს აკადემიურ სივრცეს. შესაბამისად, საკითხი ამოწურულია. სტუდენტებს შეუძლიათ, განაგრძონ სწავლა, მივიდნენ თეატრალურ უნივერსიტეტში და, ვისაც ამის სურვილი ჰქონდა რეალურად, ვისი მიზანიც ნამდვილად ეს იყო, განაგრძოს თავისი საქმის კეთება“, – განაცხადა დავითულიანმა.

10 მარტს, თეატრალური უნივერსიტეტის იმ სტუდენტებმა, რომლებიც ქვეყანაში მიმდინარე საპროტესტო აქციებს უერთდებიან და თითქმის სამი თვე ღამეს უნივერსიტეტის ფოიეში ათენებდნენ, ელექტრონულ ფოსტაზე მიიღეს შეტყობინება, რომ სასწავლებლის ეთიკის კომისიამ მათ სტუდენტის სტატუსი შეუწყვიტა. უნივერსიტეტმა გადაწყვეტილებასთან დაკავშირებით განმარტა, რომ რექტორის ბრძანება სტატუსის შეწყვეტის შესახებ ჯერ არ იყო გამოცემული და სტუდენტებს სამი დღე ჰქონდათ ეთიკის კომისიის გადაწყვეტილების გასაჩივრებისთვის. თავად რექტორი, გიორგი შალუტაშვილი ეთიკის კომისიის გადაწყვეტილებას ეთანხმებოდა.

ერთი დღით ადრე, 9 მარტს, სტუდენტებს უნივერსიტეტი მათი ნების საწინააღმდეგოდ დაატოვებინეს. სასწავლებელში გამოძახებულმა პოლიციამ არასანქცირებული აქციისთვის პროტესტის მონაწილეები 5000-5000 ლარით დააჯარიმა.