პაპუაშვილმა განმარტა, რატომ არ მოითხოვეს გახარიას პარტიის აკრძალვა

„მათ მიმართ ჩვენი მოთხოვნა ორ კრიტერიუმს ეფუძნება. პირველია, არაკონსტიტუციურობის დასაბუთება, მეორეა – პარტიის რელევანტურობა. „გახარია საქართველოსთვის“ პარტიის შემთხვევაში მთავარი სამართლებრივი ხაზი იქნებოდა არჩევნების საბოტაჟი, თუმცა მათ თავის დროზე მანდატების შენარჩუნებით, ხოლო რამდენიმე დღის წინ განცხადებით, რომ პარლამენტში საქმიანობას განაახლებდნენ და დღეს განაახლეს, ამ არგუმენტისგანაც თავი გაითავისუფლეს“, – განაცხადა შალვა პაპუაშვილმა.

„გახარია - საქართველოსთვის“ 11 წევრი „ქართული ოცნების“ პარლამენტის საქმიანობას დღეს, 28 ოქტომბერს შეუერთდა. დღესვე, პაპუაშვილმა საკონსტიტუციო სარჩელის შინაარსზე ისაუბრა და თქვა, რომ „ერთიანი ნაციონალური მოძრაობის“, „ახალისა“ და „ლელოს“ აკრძალვას მოითხოვენ.

ამასთან, „ქართული ოცნება“ აკრძალვით ემუქრება ისეთ პოლიტიკურ პარტიებსაც, როგორებიცაა „ელენე ხოშტარია - დროა“ და „გირჩი - მეტი თავისუფლება“, „სტრატეგია აღმაშენებელი“, „ევროპული საქართველო“, „ფედერალისტები“ და „რესპუბლიკური პარტია“. პაპუაშვილის თქმით, „ვინაიდან მათ ამჟამად, მათი სიდიდით, ორგანიზაციული სტრუქტურით არსებითი გავლენა, მათ შორის, საარჩევნო ბარიერის გადალახვის რეალური პერსპექტივა არ გააჩნიათ, ამ ეტაპზე მათი აკრძალვის აუცილებლობა არ იკვეთება“.

„ქართული ოცნების“ სარჩელი არ შეიცავს არაკონსტიტუციურ პოლიტიკურ პარტიასთან დაკავშირებული პირებისთვის პოლიტიკური საქმიანობის შეზღუდვის მოთხოვნას.