შემოდგომაზე საქართველოში მოსახლეობის საყოველთაო აღწერა დაიწყება

აღწერა ორ ეტაპად განხორციელდება. 14 ნოემბრიდან 23 ნოემბრამდე მონაცემების შევსება მოქალაქეებს თავად შეეძლებათ სპეციალურ ვებპლატფორმაზე, 29 ნოემბრიდან 19 დეკემბრამდე კი საქსტატის თანამშრომლები მოსახლეობას კარდაკარის პრინციპით გამოკითხავენ.

​ნოემბერ-დეკემბრის თვეებში ამინდის შესაძლო გაუარესების გამო მესტიის, ლენტეხის, ყაზბეგის, დუშეთის (გუდამაყრის, ქვეშეთის, ხევსურეთის, უკანაფშავის, შატილის, მაღაროსკარის ადმინისტრაციულ ერთეულებში), ახმეტის (ომალოს ადმინისტრაციულ ერთეულში) და ფასანაურის ადმინისტრაციულ ერთეულში შემავალ სოფლებში აღწერა სექტემბერში ჩატარდება.

„სოციალური და დემოგრაფიული სახის მონაცემებთან ერთად, სპეციალური კითხვარის მეშვეობით შეგროვდება ინფორმაცია შინამეურნეობების სასოფლო-სამეურნეო აქტიურობის შესახებ. კერძოდ, შეგროვდება მონაცემები შინამეურნეობების სარგებლობაში არსებული მიწის სტრუქტურის, პირუტყვისა და ფრინველის სულადობის შესახებ და სხვა მნიშვნელოვანი ინფორმაცია მუნიციპალიტეტების, ტერიტორიული ერთეულების და სოფლების დონეზე“, - განაცხადა თოდრაძემ.

მოსახლეობის და სასოფლო-სამეურნეო აღწერის ბიუჯეტი 29.2 მილიონი ლარია. აღწერის წინასწარი შედეგები გამოქვეყნდება 2025 წლის ივნისში, ხოლო საბოლოო - 2026 წლის ივნისში.

საყოველთაო აღწერა ქვეყანაში ყოველ 10 წელიწადში ერთხელ ტარდება. იგი ვერ მოიცავს ოკუპირებულ ტერიტორიებს, აფხაზეთსა და ცხინვალის რეგიონს.