შვედეთის საგარეო საქმეთა სამინისტრო შვიდი ქართული არასამთავრობო ორგანიზაციის საბანკო ანგარიშების დაყადაღების გადაწყვეტილებას ეხმაურება და მას ზეწოლად აფასებს.
ახალი ამბები
მკითხველის რჩეული
- 1 რუსეთი ალეკო ელისაშვილს დაუსწრებლად ასამართლებს უკრაინაში ბრძოლისთვის
- 2 როგორ დაგეგმეს ლევან ჯანგველაძის შეკვეთილი მკვლელობა - პროკურატურამ 5 პირს ბრალი წარუდგინა
- 3 „ქართულმა ოცნებამ“ 63 მუნიციპალიტეტში მერობის კანდიდატები წარადგინა
- 4 სახელმწიფო დეპარტამენტის ანგარიში: „ტიტუშკები“, თავდასხმები მედიაზე და დაუსჯელობა
- 5 მნიშვნელოვანია, საქართველოს ხელისუფლების აღიარება საქმედ იქცეს – ზახაროვა აგვისტოს ომზე
- 6 პაპუაშვილის თქმით, მზია ამაღლობელის საქმეზე გამოტანილი განაჩენი „ელჩების სინდისზეა“
„საქართველოში სამოქალაქო საზოგადოების ორგანიზაციებზე მზარდი ზეწოლა შემაშფოთებელია, მათ შორის აქტივების ბოლოდროინდელი გაყინვა. ეს გადაწყვეტილება კიდევ ერთი ნაბიჯია არასწორი მიმართულებით საქართველოს დემოკრატიისთვის. შვედეთი ინარჩუნებს თავის მტკიცე მხარდაჭერას საქართველოს სამოქალაქო საზოგადოების მიმართ“, – წერს შვედეთის საგარეო საქმეთა სამინისტროპლატფორმა X-ზე.
ამასთან, დიპლომატიური უწყება აზიარებს ევროკავშირის საგარეო ურთიერთობათა სამსახურის პრეს-სპიკერის, ანიტა ჰიპერის 29 აგვისტოს განცხადებას, სადაც „ქართული ოცნების“ ხელისუფლების გადაწყვეტილება „პოლიტიკური დევნის“ აქტად არის შეფასებული.
არასამთავრობო ორგანიზაციების ანგარიშების დაყადაღებას ნორვეგიის საგარეო საქმეთა სამინისტროც გამოეხმაურა:
„შვიდზე მეტი არასამთავრობო ორგანიზაციის საბანკო ანგარიშების დაყადაღება საქართველოში დემოკრატიის მოშლის კიდეც ერთი ნაბიჯია და მძიმე დარტყმაა ყველა მოქალაქისთვის, ვინც სარგებლობს ამ სამოქალაქო საზოგადოების ორგანიზაციების მიერ შესრულებული მნიშვნელოვანი საქმიანობით“, – წერია სამინისტროს განცხადებაში.
27 აგვისტოს თბილისის საქალაქო სასამართლომ დააკმაყოფილა პროკურატურის შუამდგომლობა და შვიდი არასამთავრობო ორგანიზაციის საბანკო ანგარიშები დააყადაღა. „საბოტაჟის საქმის“ გამოძიების ფარგლებში, პროკურატურა მათ 2024 წლის პერიოდში საპროტესტო აქციების „დაფინანსებას“, დაჯარიმებული პირების სასარგებლოდ ჯარიმების გადახდას და მათი დაცვის ხარჯების უზრუნველყოფას ედავება.
„[არასამთავრობო ორგანიზაციების] მიზნობრივი ფინანსები გამოყენებული იქნა ისეთი აღჭურვილობის შესაძენად, როგორიც არის – სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები, რასაც აქციის მონაწილეები აქტიურად იყენებდნენ პოლიციასთან ძალადობრივი დაპირისპირების დროს“, - აცხადებს პროკურატურა.
დაყადაღებულია შემდეგი არასამთავრობო ორგანიზაციები:
- „სამოქალაქო საზოგადოების ფონდი“
- „სამართლიანი არჩევნები“
- „ინფორმაციის თავისუფლების განვითარების ინსტიტუტი“
- „დემოკრატიის მცველები“
- „საქართველოს დემოკრატიული ინიციატივა“
- „საფარი“
- „სოციალური სამართლიანობის ცენტრი“
ორგანიზაციების განცხადებით, მათი ანგარიშების დაყადაღება „ ივანიშვილის ხელისუფლების მორიგი უკანონობაა, რომელიც ლახავს ადამიანის ფუნდამენტურ უფლებებს და ევროინტეგრაციის პროცესის საბოტაჟს ემსახურება“. როგორც „სამოქალაქო საზოგადოების ფონდის“ ხელმძღვანელმა, ქეთი ხუციშვილმა განაცხადა, სასამართლოს განჩინებას გაასაჩივრებენ ჯერ ადგილობრივ დონეზე, შემდეგ კი ადამიანის უფლებათა ევროპულ სასამართლოში.
პროკურატურამ ე.წ. საბოტაჟის საქმის გამოძიება თებერვალში, „ქართულ ოცნებასთან“ აფილირებილი ორგანიზაციის „ერთიანი ნეიტრალური საქართველოს“ განცხადების საფუძველზე დაიწყო. გამოძიების ფარგლებში, მარტში დააყადაღეს „ნანუკას ფონდის“, „ფროსფერითის“, „ფონდი ერთმანეთისთვის 24/7“-ის, „სირცხვილიას“ და „თბილისის ადამიანის უფლებათა სახლის“ საბანკო ანგარიშებიც.
