ევროკავშირი „ოცნებას“ მოუწოდებს, გააუქმოს არასამთავრობოების დაყადაღების გადაწყვეტილება

„ევროკავშირი მოუწოდებს საქართველოს ხელისუფლებას, დაუყოვნებლივ გააუქმოს გადაწყვეტილება დამოუკიდებელი სამოქალაქო საზოგადოების ორგანიზაციების საბანკო ანგარიშების დაყადაღებასთან დაკავშირებით

ეს არის მორიგი თავდასხმა ფუნდამენტურ უფლებებზე და სასამართლო სისტემის რეპრესიის იარაღად გამოყენება - პოლიტიკური დევნის აქტი - ფინანსებზე წვდომის წინასწარ განზრახული აღკვეთის საშუალებით გაგუდვა, რომელიც მიზნად განსხვავებული აზრის ჩახშობას და დასჯას ისახავს“, -  ნათქვამია ევროკავშირის საგარეო ურთიერთობათა სამსახურის პრეს-სპიკერის, ანიტა ჰიპერის განცხადებაში.

განცხადებაში ვკითხულობთ, რომ „სამოქალაქო საზოგადოების ორგანიზაციები არ არიან სახელმწიფოს მტრები, არამედ დემოკრატიული პლურალიზმისა და ანგარიშვალდებულების საყრდენი“.

„წლების განმავლობაში, საქართველოს აქტიური სამოქალაქო საზოგადოება ქვეყნის ევროპული ინტეგრაციის მამოძრავებელი ძალა იყო, რასაც მისი მოქალაქეებისთვის ხელშესახები სარგებელი მოჰქონდა.

ამ ორგანიზაციების მიზანში ამოღება ფუნდამენტურ დემოკრატიულ ღირებულებებს ეწინააღმდეგება და კანდიდატი ქვეყნისგან მოსალოდნელ ძირითად პრინციპებს უთხრის ძირს.

ევროკავშირი მტკიცედ უჭერს მხარს საქართველოს მედეგ და მამაც სამოქალაქო საზოგადოებას, რომელიც ხელისუფლების მხრიდან მზარდი რეპრესიების მიუხედავად კვლავ ემსახურება მოქალაქეებს“,  - აცხადებს საგარეო ურთიერთობათა სამსახურის პრეს-სპიკერი.

სამოქალაქო საზოგადოების ორგანიზაციების მხარდამჭერი განცხადება გაავრცელა საქართველოში დიდი ბრიტანეთის საელჩომაც. მასში ნათქვამია, რომ შემაშფოთებელია სავარაუდო საბოტაჟის შესახებ გამოძიების ფარგლებში შვიდი არასამთავრობო ორგანიზაციის ანგარიშების გაყინვა. საელჩოს აშფოტებს ის ფაქტი, რომ ეს, შესაძლოა, იყოს არა რაიმე უკანონო ქმედებაზე რეაგირება, „არამედ პოლიტიკურად მოტივირებული გადაწყვეტილება, რომლის მიზანია აღნიშნული არასამთავრობო ორგანიზაციების გაჩუმება“.

„მათი დახურვა ზიანს მიაყენებს საქართველოს მოსახლეობას და კიდევ უფრო შეასუსტებს დემოკრატიული დაცვის მექანიზმების არსებობას და ანგარიშვალდებულებას ქვეყანაში“, - აღნიშნულია განცხადებაში.

27 აგვისტოს თბილისის საქალაქო სასამართლომ დააკმაყოფილა პროკურატურის შუამდგომლობა და შვიდი არასამთავრობო ორგანიზაციის საბანკო ანგარიშები დააყადაღა. „საბოტაჟის საქმის“ გამოძიების ფარგლებში, პროკურატურა მათ 2024 წლის პერიოდში საპროტესტო აქციების „დაფინანსებას“, დაჯარიმებული პირების სასარგებლოდ ჯარიმების გადახდას და მათი დაცვის ხარჯების უზრუნველყოფას ედავება.

„[არასამთავრობო ორგანიზაციების] მიზნობრივი ფინანსები გამოყენებული იქნა ისეთი აღჭურვილობის შესაძენად, როგორიც არის – სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები, რასაც აქციის მონაწილეები აქტიურად იყენებდნენ პოლიციასთან ძალადობრივი დაპირისპირების დროს“, - აცხადებს პროკურატურა.

დაყადაღებულია შემდეგი არასამთავრობო ორგანიზაციები:

• „სამოქალაქო საზოგადოების ფონდი“
• „სამართლიანი არჩევნები“
• „ინფორმაციის თავისუფლების განვითარების ინსტიტუტი“
• „დემოკრატიის მცველები“
• „საქართველოს დემოკრატიული ინიციატივა“
• „საფარი“
• „სოციალური სამართლიანობის ცენტრი“

ორგანიზაციების წარმომადგენლები აცხადებენ, რომ ეს გადაწყვეტილება ფაქტობრივად მათ ინსტიტუციურ და ფინანსურ პარალიზებას ნიშნავს. ამის მიუხედავად, ისინი საქმიანობის გაგრძელებას აპირებენ. როგორც „სამოქალაქო საზოგადოების ფონდის“ ხელმძღვანელმა, ქეთი ხუციშვილმა განაცხადა, სასამართლოს განჩინებას გაასაჩივრებენ ჯერ ადგილობრივ დონეზე, შემდეგ კი ადამიანის უფლებათა ევროპულ სასამართლოში.

პროკურატურამ ე.წ. საბოტაჟის საქმის გამოძიება თებერვალში, „ქართულ ოცნებასთან“ აფილირებილი ორგანიზაციის „ერთიანი ნეიტრალური საქართველოს“ განცხადების საფუძველზე დაიწყო. გამოძიების ფარგლებში, მარტში დააყადაღეს „ნანუკას ფონდის“, „ფროსფერითის“, „ფონდი ერთმანეთისთვის 24/7“-ის, „სირცხვილიას“ და „თბილისის ადამიანის უფლებათა სახლის“ საბანკო ანგარიშებიც.