თორნიკე თოშხუა და მინდია შერვაშიძე მოსამართლემ პატიმრობაში დატოვა

დღევანდელ პროცესზე პროკურორი ნინო ჟვანია აცხადებდა, რომ  ბრალდებულების მხრიდან კვლავ იყო ახალი დანაშაულის ჩადენისა და მოწმეებზე ზემოქმედების რისკები. დაკავებულების ადვოკატი ომარ ფურცელაძე პროკურატურის შუამდგომლობას არ დაეთანხმა და თქვა, რომ ბრალდებულების მიმართ განგრძობადი პატიმრობის გამოყენების საფუძველი არ არსებობდა. მან სასამართლოს 5000-5000 ლარის ოდენობით გირაოსა და სხვა შემზღუდავი ღონისძიებების გამოყენება შესთავაზა.

37 წლის თორნიკე თოშხუა და 33 წლის მინდია შერვაშიძე 16 აგვისტოს დააკავეს პარლამენტის წინ 1-ელ აგვისტოს მომხდარ ინციდენტთან დაკავშირებით. მათ ორ წლამდე პატიმრობა ემუქრებათ.

აქციის მონაწილეების განცხადებით, ყოფილი ფეხბურთელი ბექა გოცირიძე, რომელიც მათ პირადი მიმოწერის დროს და Facebook-ზე, საჯარო განცხადებებით ემუქრებოდა, რუსთაველზე მივიდა და იქ მყოფებს შეურაცხყოფა მიაყენა, რასაც ფიზიკური დაპირისპირება მოჰყვა. აქტივისტების თქმით, დაპირისპირების დროს გოცირიძეს ამოუვარდა დანაც, რომელიც მათ პატრულის თანამშრომლებს გადასცეს.

სოციალურ ქსელ TikTok-ზე გამოქვეყნებულ ვიდეოში, დაზარალებულად ცნობილი ბექა გოცირიძე ამბობდა: „რუსთაველზე გავიარე და ეს სვავები ახლა რომ კაცობენ და ჩემზე წერენ რაღაცეებს, ის უსამშობლოები, დამესივნენ ის ფარჩაკები. არც ნაცემი ვარ და არც არაფერი. ეს სვავები და ტურები მალე დამთავრდებით“.

როგორც პროკურორმა თქვა, ბექა გოცირიძეს 10-მდე ადამიანი გაუსწორდა და მათი დადგენის მიზნით ცალკე გამოძიება მიმდინარეობს.