საჯარო მოსამსახურეები დამოუკიდებელ პროფესიულ კავშირს აფუძნებენ

დამფუძნებლების განცხადებით, „საჯარო მოსამსახურეთა დამოუკიდებელი პროფესიული კავშირი - კონსტიტუციის 78-ე მუხლი“ ამჟამად არასრულად წარმოადგენს საჯარო სექტორში დასაქმებულ იმ პირებს, რომლებმაც საჯარო განცხადებებით გამოხატეს ერთგულება კონსტიტუციის 78-ე მუხლში გაცხადებული საქართველოს მოსახლეობის ნებისა და სახელმწიფოს ეროვნული ინტერესების მიმართ, რაც გულისხმობს ქვეყნის სუვერენიტეტის, ტერიტორიული მთლიანობის, ევროპული და ევრო ატლანტიკური მისწრაფებების დაცვას.

„ორგანიზაცია დაფუძნებისთანავე დღის წესრიგში დააყენებს იმ რეპრესიული აქტის საკითხს, რომელიც მიზნად ისახავს საჯარო სამსახურებში პოლიტიკური წმენდის დაკანონებას. პროფესიული კავშირი მზად არის, მიმართოს კანონის ფარგლებში არსებულ ყველა ზომას და დაიცვას საჯარო მოსამსახურეების უფლებები“, - განაცხადეს ორგანზიაციაში.

13 დეკემბერს „ქართულმა ოცნებამ“ დაჩქარებული წესით მიიღო „საჯარო სამსახურის შესახებ“ კანონში 4 დეკემბერს ინიცირებული ცვლილებები, რის შედეგადაც საჯარო სამსახურში დასაქმებულთა მდგომარეობა უარესდება. კერძოდ, საჯარო მოხელეები შეფასდებიან 6 თვეში ერთხელ, ხოლო არადამაკმაყოფილებელი შეფასების შემთხევვაში, ხელფასის 20% ყოველთვიურად დაუკავდება მომდევნო შესაფასებელი პერიოდის დაწყებამდე; რეორგანიზაციის შედეგად სამსახურიდან გათავისუფლებული პირის საჩივრის/სარჩელის სრულად ან ნაწილობრივ დაკმაყოფილება არ გამოიწვევს საჯარო სამსახურში მის აღდგენას; დეპარტამენტის უფროსი და მისი მოადგილე საჯარო მოხელეები აღარ იქნებიან და ადმინისტრაციული შეთანხმებით დასაქმდებიან.

საკანონმდებლო ცვლილებების დამტკიცებამდე არაერთი საჯარო მოხელე გაემიჯნა „ქართული ოცნების“ გადაწყვეტილებას, 2028 წლამდე ევროკავშირთან მოლაპარაკებების გახსნის საკითხი დღის წესრიგში არ დააყენოს. ბევრი საჯარო მოხელე მონაწილეობს 28 ნოემბრიდან მიდინარე საპროტესტო აქციებშიც, რომლის მთავარი მოთხოვნა ხელახალი საპარლამენტო არჩევნების დანიშვნაა.