საგარეჯოში „ნაციონალური მოძრაობის“ წევრებს და ჟურნალისტებს თავს დაესხნენ

თავდამსხმელებს შორის იდენტიფიცირებული არიან საგარეჯოს მერიის ეკონომიკური განვითარების და ქონების მართვის სამსახურის უფროსი გიორგი ქურდოვანიძე, საკრებულოს ფრაქცია „ქართული ოცნება-დემოკრატიული საქართველოს“ თავმჯდომარე ივანე ბეჟიაშვილი და მმართველი პარტიიდან საკრებულოს წევრები გიორგი მამისაშვილი და ვეფხია უსტიაშვილი.

„დღეს საგარეჯოში მობილიზებული იყო საგარეჯოს საკრებულოს, მთელი კახეთის საკრებულოებიდან აპარატის თანამშრომლები, საჯარო მოხელეები და პირდაპირ ძალადობაზე გადმოვიდნენ. იყო ქვების სროლა, იყო შეურაცხყოფა, ფიზიკური დაპირისპირება. მათ მიიღეს პასუხი, მაგრამ ეს არ არის გამოსავალი, ეს არ არის ნორმალური ვითარება და ხელისუფლებაა ამაზე პასუხისმგებელი“,- განაცხადა „ერთიანი ნაციონალური მოძრაობიდან“ პარლამენტის დეპუტატმა, ლევან ბეჟაშვილმა.

ინციდენტის ადგილზე მივიდა კახეთის პოლიციის დეპარტამენტის დირექტორი თეიმურაზ კალანდაძე. მას თან ახლდნენ შსს-ს სხვა რაიონული სამმართველოების უფროსებიც, რაც იმაზე მიუთითებს, რომ პოლიციას წინასწარ ჰქონდა ინფორმაცია მოსალოდნელი ძალადობის შესახებ, თუმცა მისი პრევენცია არ მოახდინეს. კალანდაძის თქმით, „გამოიძიება ყველაფერს გააკეთებს“ მოძალადეების დასასჯელად.

რამდენიმე დღის წინ „ნაციონალური მოძრაობის“ წარმომადგენლებს კასპშიც დაესხნენ თავს და მხარდამჭერებთან მათი შეხვედრის ჩაშლა სცადეს. „ქართული ოცნების“ თავმჯდომარე ირაკლი კობახიძემ მომხდარს „სამოქალაქო აქტივიზმი“ უწოდა და თქვა, რომ მმართველ პარტიას ინციდენტთან კავშირი არ აქვს. კასპში მომხდარზე არავინ დაუკავებიათ.