„ოცნება“ პარტიებს არასამთავრობო ორგანიზაციების მხარდაჭერით ლექციის ჩატარებას უკრძალავს

როგორც „ქართული ოცნების“ დეპუტატმა, ირაკლი კირცხალიამ განაცხადა, ცვლილებების ძალაში შესვლის შემდეგ უცხოურ და ქართულ იურიდიულ პირებს აღარ შეეძლებათ ლექციის, სემინარის ან სხვა მსგავსი ღონისძიების ჩატარების დაფინანსება პარტიული ინტერესების სასარგებლოდ.

„მოქმედი კანონმდებლობა, მართალია, კრძალავს პოლიტიკური პარტიის მიერ შემოწირულების მიღებას იურიდიული პირისგან, თუმცა საკანონმდებლო მოწესრიგება ტოვებს სივრცეს, რომ საქართველოში ან საქართველოს ფარგლებს გარეთ რეგისტრირებულმა იურიდიულმა პირმა ჩვენი ქვეყნის შიდა პოლიტიკაში ჩარევა და რადიკალური ოპოზიციის ჩვენი ქვეყნის საწინააღმდეგო საქმეში მხარდაჭერა და დაფინანსება შენიღბოს ლექციის, სემინარის ან სხვა მსგავსი საჯარო ღონისძიების უსასყიდლოდ მოწყობის გზით, რისი ნათელი მაგალითიც საზოგადოებამ არაერთხელ იხილა თუნდაც 2024 წლის საპარლამენტო არჩევნების წინა პერიოდში. [...]

ყველას კარგად გვახსოვს, განსაკუთრებით წინასაარჩევნო პერიოდში ე.წ. სემინარები, ქალ დეპუტატთა ვოიაჟები სხვადასხვა რეგიონში, რასაც პირდაპირ პარტიული აგიტაციის სახე ჰქონდა და შენიღბული იყო ვითომ სემინარით და რაღაც საგანმანათლებლო ნიღბებით, ინიციატივებით. ეს ყველაფერი ემსახურება ერთს - იმ დესტრუქციას, იმ უსამშობლოთა გაერთიანებას და აგენტურული ქსელის აქ სულის შთაბერვას, რომელიც კოლექტიური „ნაცმოძრაობის“ სახით მოქმედებს“, – განაცხადა კირცხალიამ დღეს, 7 აპრილს გამართულ ბრიფინგზე.

ირაკლი კირცხალიამ აღნიშნა, რომ თუ ლექცია/სემინარების ჩასატარებლად თანხა მთავრობის ან მთავრობის მიერ დადგენილი პირის/ორგანოს გვერდის ავლით ჩაირიცხება, „აუცილებლად დაჯარიმდება ის პირი თუ ეგრედ წოდებული არასამთავრობო ორგანიზაცია“.