ილიაუნის მხარდაჭერის გამო ესტონეთის ელჩი „ოცნების“ საგარეო უწყებაში დაიბარეს

სამინისტროს მიერ გავრცელებული განცხადებიდან ირკვევა, რომ ელჩს, ილიას სახელმწიფო უნივერსიტეტის მხარდამჭერი განცხადების გამო, შიდა საქმეებში ჩარევას ედავებიან.

22 თებერვალს, ესტონეთის საელჩომ Facebook-ზე გამოაქვეყნა ილიაუნის რექტორის, ნინო დობორჯგინიძისა და ელჩის ფოტო, წარწერით - „ჩვენ ვდგავართ ილიას სახელმწიფო უნივერსიტეტის გვერდით“.

„საქართველოს საგარეო საქმეთა მინისტრის პირველ მოადგილესთან, გიორგი ზურაბაშვილთან გამართული შეხვედრის დროს ესტონეთის რესპუბლიკის ელჩს ეთხოვა განმარტება იმის თაობაზე,თუ რას ემსახურებოდა მისი ამგვარი ქმედება“, - ნათქვამია სამინისტროს განცხადებაში.

უწყების ცნობით, ზურაბაშვილმა „ხაზი გაუსვა, რომ ესტონეთის ელჩის ამგვარი განცხადება მიმართულია განათლების სფეროში მიმდინარე რეფორმის პოლიტიზირებისკენ, რაც მიუღებელია დაწარმოადგენს ქვეყნის შიდა საქმეებში ჩარევის მცდელობას“.

„ელჩს განემარტა, რომ საქართველოში მიმდინარე განათლების რეფორმით დაინტერესების შემთხვევაში ესტონეთის მხარეს შესაძლებლობა აქვს, კონსულტაციები გამართოს საქართველოს განათლების, მეცნიერებისა და ახალგაზრდობის სამინისტროში, სადაც ამის თაობაზე ამომწურავ ინფორმაციას მიიღებს“, - აცხადებს „ქართული ოცნების“ საგარეო საქმეთა სამინისტრო.

ესტონეთის საელჩოს შეხვედრის შესახებ ინფორმაცია არ გაუვრცელებია.

„ქართული ოცნების“ ხელისუფლებამ უმაღლესი განათლების რეფორმა წამოიწყო და სახელმწიფო უნივერსიტეტებში სტუდენტთა მიღების კვოტები „ერთი ქალაქი - ერთი ფაკულტეტის“ პრინციპით გაანაწილა. ილიას სახელმწიფო უნივერსიტეტს პროგრამების 90%-ს უუქმებენ და 2026-2027 სასწავლო წლისთვის, ბაკალავრიატის და მაგისტრატურის საფეხურებზე მხოლოდ 360 სტუდენტის მიღების უფლებას აძლევენ.

ამ თემაზე:

ესტონეთს თავისი ელჩი საქართველოდან სომხეთში გადაჰყავს