ე.წ. არჩევნების წინ ოკუპირებულმა ცხინვალმა საოკუპაციო ხაზზე მიმოსვლა გაამარტივა

აღსანიშნავია, რომ 2022 წლის აგვისტოს შემდეგ ადგილობრივებს საოკუპაციო ხაზის გადაკვეთის უფლება მკაცრად შეზღუდულ პერიოდში - ყოველი თვის 20-დან 30 რიცხვამდე ჰქონდათ. ახალი გრაფიკით კი სიტუაცია ნაწილობრივ იცვლება:

• ე.წ. რაზდახანის (ოძისი) გამშვები პუნქტი კვირაში ოთხი დღის განმავლობაში - ხუთშაბათს, პარასკევს, შაბათსა და კვირას, 08:00-დან 18:00 საათამდე იმუშავებს.
• ე.წ. პერევის (პერეუ) გამშვები პუნქტი კი კვირაში სამი დღე - სამშაბათს, ხუთშაბათსა და შაბათს, კვლავ 08:00-დან 18:00 საათამდე იქნება ღია.

მუშაობის საათების გახანგრძლივების გარდა, ახალგორისა და ჯავის კონკრეტული სოფლების მცხოვრებთა ახლო ნათესავებს შესაძლებლობა ექნებათ, ოკუპირებულ რეგიონში შესვლისა და დროებით ყოფნისას გამარტივებული წესებით ისარგებლონ.

მიმოსვლის რეჟიმის გადახედვის შესახებ ინფორმაცია დე ფაქტო სამხრეთ ოსეთის ე.წ. პრეზიდენტის მოვალეობის შემსრულებელმა მარატ კამბოლოვმა ე.წ. უშიშროების საბჭოს სხდომის შემდეგ, საკუთარ ტელეგრამ-არხზე გაავრცელა. როგორც მან აღნიშნა, ამის მიზეზი მოსახლეობის მრავალრიცხოვანი მიმართვები და პირადი შეხვედრები გახდა.

„ლენინგორისა და ძაუს რაიონების მცხოვრებლებთან შეხვედრებზე საზღვრის გადაკვეთის საკითხი არაერთხელ დაისვა. თითოეული ასეთი მომართვის უკან კონკრეტული ცხოვრებისეული სიტუაციები დგას - მშობლების, შვილებისა და ახლობლების ნახვის შესაძლებლობა. კგბ-სა და შსს-ს დავავალე, უზრუნველყონ ახალი წესის განხორციელება უსაფრთხოების ყველა მოთხოვნის დაცვით“, - წერს კამბოლოვი.

ახალი წესი ძალაში მას შემდეგ შევა, რაც დე ფაქტო მთავრობა შესაბამის დადგენილებას მიიღებს.

აღსანიშნავია, რომ ეს გადაწყვეტილება ოკუპირებულ ცხინვალის რეგიონში 18 სექტემბერს დაგეგმილი ე.წ. საპრეზიდენტო არჩევნების წინ მიიღეს. მარატ კამბოლოვი მოსკოვის მიერ მხარდაჭერილი კანდიდატია.