დააკავეს კაცი, რომელიც მოქალაქეებს ფულის სანაცვლოდ მექსიკიდან აშშ-ში გადაყვანას სთავაზობდა

შსს-ს ინფორმაციით, 1974 წელს დაბადებულ, წარსულში ნასამართლევ და ამჟამად პირობითი მსჯავრის ქვეშ მყოფ კ.თ.-ს ბრალად თაღლითობა ედება.

„გამოძიებამ დაადგინა, რომ ბრალდებული, 7000 აშშ დოლარის სანაცვლოდ, საქართველოს მოქალაქეებს მექსიკის გავლით ამერიკის შეერთებული შტატების ტერიტორიაზე არალეგალურად გადაყვანას ჰპირდებოდა, მათ თანხას წინასწარ ართმევდა, დანაპირებს კი აღარ ასრულებდა.

საერთო ჯამში, კ.თ.-მ, დანაშაულებრივი ქმედების შედეგად, თაღლითურად მიითვისა მოქლაქეების კუთვნილი 23 900 აშშ დოლარი და 2600 ევრო“, - აცხადებენ სამინისტროში.

საქმეზე გამოძიება სისხლის სამართლის კოდექსის 180-ე მუხლის მე-3 ნაწილის „ბ“ ქვეპუნქტით მიმდინარეობს. ბრალის დამტკიცების შემთხვევაში, დაკავებულს 6-დან 9 წლამდე ვადით თავისუფლების აღკვეთა ემუქრება.