ადვოკატის თქმით, ელისაშვილმა პროტესტის გამოხატა უსამართლო სასამართლოს მიმართ

„ქართული ოცნების“ შინაგან საქმეთა სამინისტროს განცხადებით, გამოძიებით დგინდება, რომ 29 ნოემბერს, გამთენიისას, შენიღბულმა ალექსანდრე ელისაშვილმა ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა.

შსს-ს მიერ გავრცელებულ განცხადებაში ნათქვამია, რომ ელისაშვილს შემთხვევის ადგილზევე წაასწრეს სასამართლოს მანდატურის სამსახურის წარმომადგენლებმა. უწყება ამტკიცებს, რომ პოლიტიკოსმა მათ თანნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა.

„გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს. დაპირისპირებისას მიღებული დაზიანებებით, მანდატურის სამსახურის ერთ-ერთი წარმომადგენელი სამედიცინო დაწესებულებაშია გადაყვანილი. დაკავებისას, გაწეული წინააღმდეგობის გამო, დაზიანებები მიიღო ალექსანდრე ელისაშვილმაც“, - აცხადებს შსს.

ამ ეტაპზე საქმეზე გამოძიება სისხლის სამართლის კოდექსის 19-187-ე მუხლით მიმდინარეობს, რაც ნივთის დაზიანება/განადგურების მცდელობას გულისხმობს. დანაშაული ისჯება ჯარიმით, საზოგადოებისათვის სასარგებლო შრომით ვადით 100-დან 180 საათამდე, გამასწორებელი სამუშაოთი ვადით ერთ წლამდე, შინაპატიმრობით ვადით 6 თვიდან 2 წლამდე ან თავისუფლების აღკვეთით ვადით ერთიდან 5 წლამდე.

ალექსანდრე ელისაშვილის ადვოკატმა, გიორგი რეხვიაშვილმა განაცხადა, რომ მისი დაცვის ქვეშ მყოფი ნამდვილად გამთენიისას მივიდა საქალაქო სასამართლოში და იქ პროტესტის ნიშნად ცეცხლის გაჩენა ჰქონდა განზრახული.

„პროტესტი გამოხატა უსამართლო სასამართლოს მიმართ. „ცეცხლი ოლიგარქიას და ცეცხლი უსამართლო სასამართლოს“ - ეს სიტყვები მთხოვა გადმომეცა. ერთადერთი იმას ნანობს, რომ რამდენიმე წამი დააკლდა საქმის ბოლომდე მისაყვანად.

აირჩია შაბათი დღე დილის საათები, რომ არავინ დაზიანებულიყო.

უნდოდა საზოგადოებისთვის ენახვებინა რეალურად ეს სასამართლო რამდენ ადამიანს უკანონოდ და უსამართლოდ ასამართლებს და როგორ იყენებს რეჟიმის და დიქტატურის გასამყარებლად“, - განაცხადა ადვოკატმა. მისი თქმით, ის 10 საათი ცდილობდა ალეკო ელისაშვილთან შეხვედრას.

კითხვაზე, აღიარებს თუ არა დანაშაულს ელისაშვილი, გიორგი რეხვიაშვილმა განაცხადა, რომ არა, ვინაიდან ჯერ არ იციან, რა ბრალს წაუყენებს მას პროკურატურა.

ადვოკატის თქმით, ალექსანდრე ელისაშვილს მანდატურის სამსახურის თანამშრომლებმა დაზიანებები მიაყენეს მაშინ, როდესაც მას ხელბორკილები უკვე ედო.