ვახო სანაია დააკავეს - „ფორმულა“ ჟურნალისტის დაუყოვნებლივ გათავისუფლებას ითხოვს

„დღეს რეჟიმის პოლიციამ „ფორმულას“ წამყვანი, ჟურნალისტი ვახო სანაია დააკავა. მას, სავარაუდოდ, ახალი რეპრესიული კანონებით, აქციაში მონაწილეობას ედავებიან“, - ნათქვამია „ფორმულას“ მიერ გავრცელებულ განცხადებაში.

„ფორმულა" ვახო სანაიას დაკავებას განიხილავს, როგორც რეჟიმის მხრიდან ჟურნალისტის და მთლიანად დამოუკიდებელი მედიის შევიწროვებას.

„ამ რეპრესიულ გარემოში სამოქალაქო უფლებების უკიდურესი შეზღუდვის ფონზე, მედიის თავისუფლების ხელყოფა კიდევ უფრო თვალსაჩინო ხდება. ეს ხდება მაშინ, როცა ხვალ, 20 ოქტომბერს ევროკავშირის უმაღლესი რანგის დიპლომატები საქართველოში არსებულ ვითარებას, მათ შორის მედიაზე ზეწოლას განიხილავენ.

ვახო სანაია მთავარი საინფორმაციო გადაცემის, ასევე „კვირის ფორმულას“ წამყვანია და ის ახლა ეთერისთვის უნდა ემზადებოდეს“, - ტელეკომპანია „ფორმულა“ ჟურნალისტის დაუყოვნებლივ გათავისუფლებას ითხოვს და საერთაშორისო საზოგადოებას მხარდაჭერისკენ მოუწოდებს.

პოლიცია რუსთაველის გამზირზე მიმდინარე უწყვეტი საპროტესტო აქციის მონაწილეებს აკავებს. „ქართული ოცნების“ მიერ მიღებული რეპრესიული კანონმდებლობის საფუძველზე, მათ 15-დღიანი პატიმრობა ემუქრებათ.

16 ოქტომბერს, „ქართულმა ოცნების“ პარლამენტმა ადმინისტრაციულ სამართალდარღვევათა კოდექსში ცვლილებები შეიტანა. შედეგად, შეკრების ან მანიფესტაციის მონაწილის მიერ სახის ნიღბით დაფარვის, ცრემლსადენი ან მომწამვლელი ნივთიერების ქონის, გზის გადაკეტვის ან დროებითი კონსტრუქციის მოწყობის პირველივე შემთხვევა გამოიწვევს ადმინისტრაციულ პატიმრობას 15 დღემდე ვადით, ხოლო თუ სამართალდამრღვევი აქციის ორგანიზატორია, ადმინისტრაციულ პატიმრობას 20 დღემდე ვადით. ამგვარი აკრძალული ქმედებების განმეორებით ჩადენა სისხლის სამართლის წესით, 1 წლამდე პატიმრობით დაისჯება.