„ჩვენ ყველა უნდა ვემზადოთ უკრაინის გარდაუვალი გამარჯვებისთვის. უკრაინა და დასავლური კოალიციისთვის ოკუპირებული ზონები შავი ზღვის რეგიონში სრულიად მიუღებელი იქნება“, - აცხადებს საქართველოს ყოფილი პრეზიდენტი, პატიმრობაში მყოფი მიხეილ სააკაშვილი.
ახალი ამბები
მკითხველის რჩეული
- 1 რა მოხდა თელავის სასტუმროში, სადაც რუსეთის მოქალაქის ცემის ბრალდებით მამაკაცი დააკავეს
- 2 გაუპატიურება, წამება და დაკარგული ჩვილი - ნატა ვიბლიანის საქმეზე გამოძიება დაიწყო
- 3 დამოუკიდებელი მედიების რედაქტორები ელისო კილაძის საქმის განხილვის საჯაროობას ითხოვენ
- 4 მძღოლს, რომელმაც გორში ავარიით დედა-შვილი იმსხვერპლა, 225 ვიდეოჯარიმა ჰქონდა
- 5 ციხიდან ვადაზე ადრე გაათავისუფლეს ლაშა ფურცხვანიძე, რომელმაც 13 წლის ბავშვი იმსხვერპლა
- 6 „სააფთიაქო ნარკომანიის“ საქმეზე დააპატიმრეს ჯანდაცვის მინისტრის ყოფილი მოადგილე
განცხადებაში, რომელიც დღეს Facebook-ში ექსპრეზიდენტის ოფიციალურ გვერდზე გავრცელდა, სააკაშვილი აღნიშნავს, რომ „პუტინის სიგიჟის შედეგად“, დღეს ზელენსკი მთელი თავისუფალი სამყაროს ლიდერია.
„ჩვენ უნდა ვემზადოთ აფხაზეთის და შიდა ქართლის გათავისუფლებისათვის. ეს ფანჯარა სულ მალე გაიხსნება და ყველამ ერთად უნდა გამოვიყენოთ ის მომენტი, როცა რუსეთის არმია ბოლომდე იქნება ჩამოშლილი და მოსკოვში არეულობა დაისადგურებს“, - წერს სააკაშვილი.
საქართველოს ყოფილი პრეზიდენტის თქმით, ზელენსკის აქვს ფართო სტრატეგიული ხედვა, რომელიც ომის შემდეგ დაეფუძნება ევროპის უძლიერეს შეიარაღებულ ძალებს და იმას, რომ უკრაინის სიტყვას მსოფლიოში ძალიან დიდი წონა ექნება.
„საქართველო, აფხაზეთის ჩათვლით, ასევე თავის მხრივ იქცევა მთელი მსოფლიოსთვის მიმზიდველ და ძალიან მდიდარ ქვეყნად.
მე არ გამოვრიცხავ რომ შავიზღვისპირეთში ჩვენ საერთო საზღვარი გვქონდეს უკრაინასთან. დღეს პრეზიდენტ ზელენსკიზე და უკრაინის არმიაზეა ჩამოკიდებული მთლიანად ჩვენი ქვეყნის ყოფნა-არ ყოფნა და გამარჯვება.
აბსოლუტურად დარწმუნებული ვარ ზელენსკის, დასავლეთის, უკრაინის და ესე იგი, ქართველი ხალხის სწრაფ გამარჯვებაში. ვემზადოთ ფსოუზე ქართულ-უკრაინული საზღვრის მოსაწყობად!“, - აღნიშნავს მიხეილ სააკაშვილი.
სააკაშვილის ამ განცხადებას წინ უძღოდა ევროპული პოლიტიკური გაერთიანების სამიტზე უკრაინის პრეზიდენტის გუშინდელი გამოსვლა. ზელენსკიმ თქვა, რომ ყველა ევროპული ქვეყანა, რომელიც რუსეთს ესაზღვრება და რომელსაც არ უნდა, რომ რუსეთმა დაშალოს, ევროკავშირისა და NATO-ს სრულუფლებიანი წევრი უნდა იყოს. როგორც მან აღნიშნა, სხვა შემთხვევაში მხოლოდ ორი ალტერნატივაა - ან ღია ომი ან მცოცავი რუსული ოკუპაცია.
„ჩვენ ვხედავთ, რა ხდება ბელარუსში. ჩვენ ვხედავთ, რა ხდება საქართველოში. ჩვენ ვხედავთ, როგორ ითრევენ ამ ერებს, თუმცა სხვადასხვა გზით, ერთსა და იმავე განუკითხაობის მდგომარეობაში. მაგრამ რას ხედავენ ისინი? თუკი უკრაინელებსაც კი, რომლებიც სისხლით ადასტურებენ ერთგულებას თავისუფლებისა და ერთიანი ევროპული ღირებულებებისადმი, ჯერ კიდევ არ სმენიათ მკაფიო დადებითი პასუხი ევროკავშირსა და NATO-ში გაწევრიანების შესახებ, სხვების იმედები სრულიად მოჩვენებითი ხდება“, - განაცხადა ზელენსკიმ.
საქართველოს მესამე პრეზიდენტი, რომელსაც ახლა უკრაინის მოქალაქეობა აქვს, 2021 წლის 1-ელ ოქტომბერს, თბილისში, ადგილობრივი თვითმმართველობის არჩევნების წინა დღეს დააკავეს. მას 6 წლით თავისუფლების აღკვეთა აქვს მისჯილი. ერთ წელზე მეტია, მიხეილ სააკაშვილი ჯანმრთელობის მდგომარეობის გამო სპეციალური პენიტენციური სამსახურის კონტრაქტორ კლინიკა „ვივამედში“ იმყოფება. ადამიანის უფლებათა ევროპულმა სასამართლომ არ დააკმაყოფილა მისი მოთხოვნა სამკურნალოდ საქართველოდან პოლონეთში გადაყვანაზე.
