უკრაინამ რუსეთის დედაქალაქზე უპილოტო საფრენი აპარატებით იერიში მიიტანა. მოსკოვის მერის, სერგეი სობიანინის განცხადებით, 26 ოქტომბრის საღამოდან 27 ოქტომბრის დილამდე რუსეთის საჰაერო თავდაცვის ძალებმა ჩამოაგდეს სულ მცირე 34 დრონი, რომელიც მოსკოვისკენ მიფრინავდა.
ახალი ამბები
მკითხველის რჩეული
- 1 „სფერო ჰოლდინგის“ საქმეზე კიდევ ერთი პირი, სოფიკო პეტრიაშვილი დააკავეს
- 2 6 წელზე მეტი ასაკის ავტომობილების იმპორტი 1-ელი აპრილიდან აიკრძალება
- 3 ლავროვი: „3+3“ ფორმატში საქართველოსთვის კარი ღიაა
- 4 18 წლის ბიჭის მკვლელობისთვის ივანე გიგლემიანს უვადო პატიმრობა მიუსაჯეს
- 5 ტელეკომპანია „იმედი“ 1000 ლარად კომპანია „პრაიმ მედია გლობალმა“ იყიდა
- 6 მოზარდზე ძალადობისთვის გლდანი-ნაძალადევის პოლიციის უფროსის მოადგილე დააკავეს
მოსკოვის ორი აეროპორტი, დომოდედოვო და ჟუკოვსკი, ღამით დროებით დაიხურა. თავდასხმის შედეგად დაშავებულების ან ზარალის შესახებ ინფორმაცია არ გავრცელებულა.
თავდაცვის სამინისტროს ცნობით, რუსეთის თავზე ღამით 193 დრონი ჩამოაგდეს. 47 დრონმა ბრიანსკის ოლქს, 42-მა კალუგის, ხოლო 40-მა მოსკოვის ოლქს შეუტია. დრონები შენიშნეს კიდევ 10 ოლქში, მათ შორის უკრაინის მოსაზღვრე რეგიონებში.
ბრიანსკის ოლქში, როგორც რეგიონის გუბერნატორმა, ალექსანდრე ბოგომაზმა თქვა, სოფელ პოგარში დრონი თავს დაესხა მიკროავტობუსს, რომელსაც მშვიდობიანი მოქალაქეები გადაჰყავდა. მძღოლი დაიღუპა, ხუთი მგზავრი კი დაშავდა. ბელგოროდის ოლქის გუბერნატორის, ვიაჩესლავ გლადკოვის განცხადებით, რაკიტიანის რაიონში დაიღუპა ერთი და დაშავდა 23 მშვიდობიანი მოქალაქე, რომელთა შორის სამი ბავშვია.
უპილოტო საფრენი აპარატების დარტყმების შესახებ განაცხადეს ვოლგოგრადის, ლენინგრადის, ივანოვოს, ვორონეჟისა და პენზას ოლქებშიც. დროებით დაიხურა ვოლგოგრადის, გელენჯიკისა და იაროსლავლის აეროპორტებიც.
რუსეთის მასირებული საჰაერო შეტევა განხორციელდა უკრაინაზე. კიევში სულ მცირე ორი ადამიანი დაიღუპა და 10-ზე მეტი დაშავდა. ხელისუფლების ინფორმაციით, დედაქალაქში დაზიანებულია საცხოვრებელი სახლები, საბავშვო ბაღი, სასწავლო დაწესებულება, სავაჭრო ობიექტები და სატრანსპორტო საშუალებები. რუსეთის თავდაცვის სამინისტრომ დარტყმების სამიზნედ სამხედრო-სამრეწველო კომპლექსები და ენერგეტიკული ინფრასტრუქტურის ობიექტები დაასახელა.
