თუ ვინმე ფიქრობს, რომ ევროპას შეუძლია დაიცვას თავი აშშ-ის გარეშე, გააგრძელეთ ოცნება – რუტე

„თუ აქ ვინმე ფიქრობს, რომ ევროკავშირს, ან მთლიანად ევროპას, შეუძლია დაიცვას თავი აშშ-ის გარეშე, გააგრძელეთ ოცნება. თქვენ არ შეგიძლიათ. ჩვენ არ შეგვიძლია. ჩვენ ერთმანეთი გვჭირდება“, – განაცხადა რუტემ.

მარკ რუტემ ასევე აღნიშნა, რომ აშშ-საც სჭირდება ნატო და ნატოს წევრია, მათ შორის, აშშ-ის უსაფრთხოებისთვის.

„არქტიკის რეგიონი ამის დასტურია, მათ უსაფრთხო არქტიკა სჭირდებათ. მათ უსაფრთხო ევროატლანტიკური სივრცე და ასევე უსაფრთხო ევროპა სჭირდებათ. ამგვარად, აშშ-ს ყველა მიზეზი აქვს, იყოს ნატოს წევრი, ისევე როგორც კანადას და ნატოს ევროპელ მოკავშირეებს“, – განაცხადა გენმდივანმა.

რუტეს თქმით, თუ ევროპას ნამდვილად სურს „დამოუკიდებლად მოქმედება“, მაშინ თითოეული ქვეყნის თავდაცვის ხარჯები უნდა გაიზარდოს არა მშპ-ს 5%-მდე, როგორც ამაზე ნატოს წევრები 2025 წლის ივნისში შეთანხმდნენ, არამედ 10%-მდე.

„უნდა გახსოვდეთ, რომ 5%-ით ვერასდროს მიაღწევთ თქვენს მიზანს. თქვენ გჭირდებათ 10%. თქვენ უნდა განავითაროთ საკუთარი ბირთვული პოტენციალი. ეს მილიარდობით და მილიარდობით ევრო ღირს. წინააღმდეგ შემთხვევაში, თქვენ წააგებთ. თქვენ დაკარგავთ ჩვენი თავისუფლების მთავარ გარანტიას - აშშ-ის ბირთვულ ქოლგას. ასე რომ, წარმატებებს გისურვებთ“, – განაცხადა რუტემ.

მისივე თქმით, რომ არა აშშ-ის პრეზიდენტი დონალდ ტრამპი ნატოს წევრების მიერ თავდაცვის ხარჯების გაზრდა არასდროს მოხდებოდა.

რუტემ ასევე გააკრიტიკა ერთიანი ევროპული თავდაცვის ძალების შექმნის იდეა. ასეთი გაერთიანების შექმნა, მისი თქმით, მრავალრიცხოვან დუბლირებად სტრუქტურებს შექმნის, რაც სიტუაციას გაართულებს: „წარმატებებს გისურვებთ, თუ ამის გაკეთება გინდათ, რადგან ფორმიანი ქალებისა და კაცების პოვნა მოგიწევთ, რაც არსებულ პრობლემებს კიდევ უფრო გაამწვავებს და საქმეს კიდევ უფრო გაართულებს. ვფიქრობ, პუტინს ეს მოეწონება. ასე რომ, კიდევ ერთხელ დაფიქრდით“.