კონკურენციისა და მომხმარებლის დაცვის სააგენტომ ოთხი ფარმაცევტული კომპანია – „გლობალ ცბს“, „კონცეპტ ფარმა“, „რიჩ გრუპი“ და „გეა“, ჯამში, 559 358 ლარით დააჯარიმა.
ახალი ამბები
მკითხველის რჩეული
- 1 „რეპრესიები რეორგანიზაციის სახელით“ - თელავის უნივერსიტეტიდან 5 პროფესორი გაათავისუფლეს
- 2 თავდაცვის ყოფილი მინისტრის მოადგილე და ნათესავი დააკავეს 1.3 მლნ-ის გაფლანგვის ბრალდებით
- 3 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
- 4 ნათესავებმა თბილისში იპოვეს ჩეჩნეთიდან ოჯახში ძალადობას გამოქცეული ქალი და მისი წაყვანა სცადეს
- 5 სტრასბურგის სასამართლომ გამოაქვეყნა კითხვები მზია ამაღლობელის საქმეზე
- 6 ახობაძის ადვოკატი: ექსპერტმა დაადასტურა, რომ ნარკოტიკის შესაფუთ მასალაზე გადატანილი იყო ნერწყვი
სააგენტოს განცხადებით, მოკვლევის შედეგად დადგინდა, რომ აღნიშნული ოთხი კომპანია დომინანტურ მდგომარეობას ბოროტად იყენებდა, რაც მომხმარებლისთვის მედიკამენტებზე ჭარბი ფასის დაწესებაში გამოიხატა. სააგენტოს პოზიციით, ფასები გონივრულ დონეს მნიშვნელოვნად აღემატებოდა.
„მოკვლევის პროცესში გამოვლინდა, რომ გარკვეული მედიკამენტების თვითღირებულებაში შეტანილი იყო ისეთი ხარჯები, რომლებიც უშუალოდ ფასწარმოქმნას არ უკავშირდება და შეიძლება მიანიშნებდეს ფასის ხელოვნურ ზრდას. კერძოდ, ძვირადღირებული საჩუქრები, მათ შორის, ოქროს სამკაულები; კულტურულ ღონისძიებებზე, სპექტაკლებზე სტუმრების მოწვევა; არაფორმალურ გარემოში სხვადასხვა მხარეებთან შეხვედრები; ევროპასა და საქართველოში კონფერენციების და მაღალი კლასის სასტუმროებში განთავსების ხარჯები; კოსმეტოლოგიური და სტომატოლოგიური ხარჯები; ჯარიმებისა და კანონით გათვალისწინებული სანქციების ხარჯები; პრემიუმ კლასის ავტომობილების მომსახურება და სხვა“, - აცხადებენ კონკურენციისა და მომხმარებლის დაცვის სააგენტოში.
სააგენტოს ინფორმაციით, კომპანიები შემდეგ მედიკამენტებზე დაწესებული ფასების გამო დაჯარიმდნენ:
- შპს „გლობალ ცბს“: მედიკამენტები - ოფლაბ-ოზი, ჰაიზინი, იორილი-10. ჯარიმის მოცულობა - 249 144 ლარი;
- შპს „კონცეპტ ფარმა“: მედიკამენტი - ფლოქაზოლი. ჯარიმის მოცულობა - 21 646 ლარი;
- შპს „რიჩ გრუპი“: მედიკამენტი - ზინასენი. ჯარიმის მოცულობა - 77 936 ლარი;
- შპს „გეა“: მედიკამენტები - ბისეპტოლი 120 მლ. ბისეპტოლი 480 მლ. ჯარიმის მოცულობა - 210 632 ლარი;
კონკურენციის სააგენტომ ფარმაცევტული ბაზრის მოკვლევა ჯანდაცვის სამინისტროს მიმართვის საფუძველზე, 2023 წლის დეკემბერში დაიწყო. მოკვლევის მიზანს წარმოადგენდა დადგენილიყო, იყო თუ არა მაღალი ფასნამატები (300-3000%-მდე) გამოწვეული ბაზრის დომინანტური მოთამაშეების მხრიდან არაკონკურენტული ქმედებებით.
სააგენტოში განმარტავენ, მოკვლევა ეხება იმ პერიოდს, როდესაც რეფერენტული ფასები ჯერ არ იყო დაწესებული. „დღევანდელი მდგომარეობით, რეფერენტული ფასების ამოქმედებამ მედიკამენტებზე არსებული მაღალი ფასნამატები მნიშვნელოვნად გაანეიტრალა“, - ნათქვამია კონკურენციის სააგენტოს განცხადებაში.
