ამერიკის შეერთებული შტატების არჩეული პრეზიდენტი დონალდ ტრამპი ქვეყნის მთავარი დიპლომატის - სახელმწიფო მდივნის თანამდებობაზე, სავარაუდოდ, დანიშნავს ფლორიდის სენატორ მარკო რუბიოს. ამის შესახებ საერთაშორისო მედია იუწყება.
ახალი ამბები
მკითხველის რჩეული
- 1 თავდაცვის ყოფილი მინისტრის მოადგილე და ნათესავი დააკავეს 1.3 მლნ-ის გაფლანგვის ბრალდებით
- 2 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
- 3 სტრასბურგის სასამართლომ გამოაქვეყნა კითხვები მზია ამაღლობელის საქმეზე
- 4 რუსეთი ალეკო ელისაშვილს დაუსწრებლად ასამართლებს უკრაინაში ბრძოლისთვის
- 5 „სამედიცინო დახმარება თუ გინდა, სხვა ქვეყნებიც არის“ - კობახიძე უვიზოს შესაძლო შეჩერებაზე
- 6 „ოცნების“ ყოფილი დეპუტატი ლუკა კურტანიძე ყოფილ ცოლზე ძალადობის შემდეგ დააკავეს
53 წლის რუბიო სენატში 2010 წელს აირჩიეს. ამჟამად ის დაზვერვის კომიტეტის თავმჯდომარის მოადგილე და საგარეო ურთიერთობათა კომიტეტის უფროსი წევრია. მარკო რუბიო საგარეო პოლიტიკის მიმართულებით „ქორად“, ანუ ხისტი პოზიციების გატარების მომხრედ მიიჩნევა, განსაკუთრებით, ჩინეთის, ირანის, ვენესუელისა და კუბის მიმართ.
გამოცემა Reuters-ის თანახმად, „უკრაინის კრიზისი რუბიოს დღის წესრიგის მთავარი შემადგენელი ნაწილი იქნება.“ ბოლო ინტერვიუებში ის ამბობდა, რომ უკრაინამ უფრო მეტად რუსეთთან მოლაპარაკებების გზების მოძიებაზე უნდა იზრუნოს, ვიდრე ბოლო ათწლეულში რუსეთის მიერ დაკავებული ტერიტორიების დაბრუნებაზე.
ამასთან, მარკო რუბიო ერთ-ერთი იყო იმ 15 რესპუბლიკელ სენატორთაგან, ვინც აპრილში უკრაინისთვის 95 მილიარდი დოლარის სამხედრო დახმარების პაკეტის წინააღმდეგ მისცა ხმა. პაკეტი 46 დემოკრატის, 31 რესპუბლიკელის და 2 დამოუკიდებელი სენატორის მხარდაჭერით გავიდა.
როგორც დასავლური მედია წერს, რუბიომ ტრამპთან მეკავშირეობის პარალელურად თავისი მკაცრი მიდგომები შეარბილა. „მე არ ვარ რუსეთის მხარეს, მაგრამ, სამწუხაროდ, რეალობა ის არის, რომ უკრაინაში ომის დასრულება მოლაპარაკების გზით არის შესაძლებელი“, - განუცხადა რუბიომ NBC-ს სექტემბერში.
თუ მედიაში გავრცელებული ინფორმაცია დადასტურდება, მარკო რუბიო იქნება პირველი ლათინოამერიკელი, ვინც ამერიკის მთავარი დიპლომატის თანამდებობას დიკავებს.
დონალდ ტრამპი და მისი ადმინისტრაცია მუშაობას იანვარში, ინაუგურაციის შემდეგ შეუდგებიან.
