თელ-ავივში, ქალაქ იაფაში, რკინიგზის სადგურზე მომხდარ თავდასხმას საქართველოს მოქალაქე ემსხვერპლა. გუშინ, 1-ელ ოქტომბერს, ორმა შეიარაღებულმა პირმა ირგვლივ მყოფებს ცეცხლი გაუხსნა და ცივი იარაღით დაესხა თავს, რის შედეგადაც სულ მცირე 7 ადამიანი დაიღუპა.
ახალი ამბები
მკითხველის რჩეული
- 1 რუსეთის 2 361 მოქალაქეს მიანიჭეს საქართველოს მოქალაქეობა 2024 წელს
- 2 თბილისის პოლიციის დეპარტამენტის დირექტორად ლაშა გოგნიაშვილი დაინიშნა
- 3 კობახიძე რუსეთის ხსენების გარეშე 9 აპრილზე პასუხისმგებლად „უცხოურ ძალას“ აცხადებს
- 4 რა წერია უცხოური გრანტების წინააღმდეგ „ქართული ოცნების“ კანონპროექტში
- 5 აქციის მონაწილეებმა რუსთაველის გამზირზე, 9 აპრილის მემორიალთან ღამე გაათენეს
- 6 ბრიტანეთმა ადამიანის უფლებების დარღვევის გამო „ოცნების“ 4 მაღალჩინოსანი დაასანქცირა
„ისრაელში საქართველოს საელჩო ადასტურებს 1 ოქტომბერს მომხდარი ტერაქტის შედეგად საქართველოს ერთი მოქალაქის გარდაცვალებას. საელჩო მუშაობს ისრაელის შესაბამის სტრუქტურებთან გარდაცვლილი თანამემამულის საქართველოში გადმოსვენების შესაძლებლობაზე, რაც ბუნებრივია მოითხოვს გარკვეულ დროს, მისი დაღუპვის გარემოებების გათვალისწინებით“, - განაცხადეს საქართველოს საგარეო საქმეთა სამინისტროში.
საგარეო უწყება მომხდარის გამო უსამძიმრებს გარდაცვლილის ოჯახს, ასევე ისრაელის მთავრობას და ისრაელის ხალხს.
„საქართველო გმობს ტერორიზმის ნებისმიერ გამოვლინებას“, - ვკითხულობთ განცხადებაში.
ისრაელის პოლიციის ინფორმაციით, სროლა სარკინიგზო ვაგონში დაიწყო და პლატფორმაზე გაგრძელდა. 7 დაღუპულის გარდა არიან დაჭრილებიც, რომელთაგან სამის ჯანმრთელობის მდგომარეობა მძიმეა.
როგორც პოლიცია ამბობს, ორივე თავდამსხმელი გარშემომყოფებმა „გაანეიტრალეს“. დანაშაულის მოტივად ტერორიზმი სახელდება.
მედიის ცნობით, იაფაში სროლა ისრაელის წინააღმდეგ ირანის სარაკეტო თავდასხმის დაწყებამდე ცოტა ხნით ადრე მოხდა.
