შსს-ს თანამშრომელს, რომელიც დუშეთში ქვეითს დაეჯახა, პატიმრობა შეეფარდა

გორის რაიონული სასამართლოს მოსამართლე გერმანე დადეშქელიანმა დღევანდელ პროცესზე არ დააკმაყოფილა ადვოკატის შუმდგომლობა, 20 000-ლარიანი გირაოს სანაცვლოდ ბრალდებულის გათავისუფლების შესახებ.

ავტოსაგზაო შემთხვევა ქალაქ დუშეთის შესასვლელთან, 6 თებერვლის ღამეს მოხდა. საქმის მასალების მიხედვით, თამაზ ბრაჭულმა, რომელიც საკუთარ ავტომობილს მართავდა, დაარღვია საგზაო მოძრაობის შესახებ კანონის მოთხოვნები, ვერ უზრუნველყო ავტომობილის უსაფრთხო მართვა და ქვეითს დაეჯახა. ბრალდების მხარე აცხადებს, რომ ამის შემდგომ, მძღოლმა სიცოცხლისთვის საშიშ მდგომარეობაში მყოფი ქვეითი მიატოვა, შემთხვევის ადგილიდან მიიმალა და მანქანა გადამალა.

„ბრალდებულმა დაზარალებული მიატოვა და სწორედ ამ მიტოვების შემდეგ გარდაიცვალა ის. გარდაცვლილს ჰქონდა დაზიანებები, მათ შორის თავის არეში ნახეთქი ჭრილობები. ცხედარს სამედიცინო ექსპერტიზა უტარდება“, - განაცხადა პროკურორმა ნინო ზურაბაშვილმა.

თამაზ ბრაჭული 9 თებერვალს დააკავეს. მას ბრალდება სისხლის სამართლის კოდექსის 128-ე და 276-ე მუხლის მე-6 ნაწილით აქვს წარდგენილი, რაც გულისხმობს განსაცდელში მიტოვებას და ავტომობილის მოძრაობის უსაფრთხოების წესის დარღვევას, რამაც ადამიანის სიცოცხლის მოსპობა გამოიწვია. თამაზ ბრაჭული ბრალდებას არ ეთანხმება. როგორც ის ამბობს, „მხედველობა -2 აქვს“ და ამის გამო, ქვეითი არ შეუმჩნევია. ის მიმალვას და მანქანის გადამალვასაც უარყოფს.

საქმეზე წინასასამართლო სხდომა 5 აპრილისთვის ჩაინიშნა.

ოჯახის წევრების ინფორმაციით, თამაზ ბრაჭული 25 წლის განმავლობაში დუშეთის დროებითი მოთავსების იზოლატორში მუშაობდა.