თბილისში, პარლამენტთან მიმდინარე საპროტესტო აქციაზე შეკრებილი მოქალაქეების წინააღმდეგ შინაგან საქმეთა სამინისტროს განსაკუთრებულ დავალებათა დეპარტამენტის თანამშრომლებმა წიწაკის სპრეი გამოიყენეს, რის გამოც რამდენიმე ადამიანი დაშავდა.
ახალი ამბები
მკითხველის რჩეული
- 1 სამხარაძე: არაბმა პარტნიორებმა ინვესტიციების წინააღმდეგ კამპანიაზე რეაგირება გვთხოვეს
- 2 აბასთუმნის თავზე ფრენა აიკრძალა - რატომ ჩაკეტა სახელმწიფომ ცა იქ, სადაც ივანიშვილი ცხოვრობს
- 3 უცხოეთში მყოფ წვევამდელებს ჯარში გაწვევისას საქართველოში დაბრუნება მოუწევთ
- 4 პოლონეთში 5 თვის ჩვილის გარდაცვალების საქმეზე ნუგზარ ქავთარაშვილს ეძებენ
- 5 მარნეულის მერის ძმა ბიზნესმენზე ჯგუფური თავდასხმის ბრალდებით დააკავეს
- 6 ირანის ელჩი: თუ რეგიონიდან იქნება ქმედება ჩვენ წინააღმდეგ, გვექნება რეაქცია
შსს-ს სხვადასხვა დანაყოფის წარმომადგენლები, რომლებიც საკანონმდებლო ორგანოსთან დიდი რაოდენობით არიან მობილიზებული, მოქალაქეებს ძალის გამოყენებით ატოვებინებენ პარლამენტის შესასვლელებს, საიდანაც დეპუტატები უნდა გამოვიდნენ. გავრცელებული კადრებიდან ჩანს, რომ სამართალდამცველები აქციის მონაწილეებს ფიზიკურადაც უსწორდებიან და აკავებენ. ადგილზე მობილიზებულია წყლის ჭავლის მანქანა.
წიწაკის სპერეით დაშავდა „ერთიანი ნაციონალური მოძრაობის“ წევრი, დეპუტატი ანა წითლიძეც. მას სამედიცინო ბრიგადის დახმარება დასჭირდა.
„როდესაც დარბევა დაიწყეს, მშვიდობიანი ახალგაზრდები ხელებაწეულები იდგნენ. დაგვაცალეს გაზი, წიწაკის სპრეი, ყველაფერი ერთად. ეს იმიტომ მოხდა, რომ „ქართული ოცნების“ მშიშარა დეპუტატები პარლამენტიდან მშვიდად გასულიყვნენ“, - თქვა წითლიძემ.
შინაგან საქმეთა სამინისტროში განაცხადეს, რომ აქციის მონაწილეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს. სამინისტროში ასევე განმარტავენ, რომ „კანონით დადგენილი სპეციალური საშუალებები“ მართლწესრიგის აღდგენის მიზნით იქნა გამოყენებული.
„მოვუწოდებთ, პოლიტიკურ ლიდერებს, აქციის ორგანიზატორებსა და მონაწილეებს, არ გასცდნენ შეკრებისა და მანიფესტაციის კანონით დადგენილ ნორმებს. კანონდარღვევის თითოეულ ფაქტს შესაბამისი სამართლებრივი რეაგირება მოჰყვება“, - ნათქვამია შსს-ს განცხადებაში.
დღეს, 30 აპრილს, „ქართულმა ოცნებამ“ პარლამენტის პლენარულ სხდომაზე რუსული კანონი მეორე მოსმენაზე გაიტანა. დეპუტატებმა 11 პუნქტიდან დღეს მხოლოდ 3 განიხილეს. რუსული კანონის განხილვა ხვალ გაგრძელდება და სავარაუდოდ, ხვალვე უყრიან კენჭს.
რუსული კანონის საწინააღმდეგო და საქართველოს ევროინტეგრაციის მხარდამჭერი აქციები თბილისში 15 აპრილიდან, ყოველდღე იმართება. მრავალათასიანი დემონსტრაციების ორგანიზატორები ძირითადად სტუდენტები და სამოქალაქო აქტივისტები არიან.
