ბრიუსელში, ევროკავშირის საგარეო საქმეთა საბჭოს სხდომაზე, 27 ქვეყნის საგარეო საქმეთა მინისტრებმა საქართველოში განვითარებული მოვლენები განიხილეს და „დიპლომატიური პასპორტების მფლობელებისთვის უვიზო რეჟიმის შეჩერების საჭიროებაზე“ შეთანხმდნენ.
ახალი ამბები
მკითხველის რჩეული
- 1 სტრასბურგის სასამართლომ გელა მთივლიშვილის საქმის არსებითი განხილვა დაიწყო
- 2 დიდმა ბრიტანეთმა ლევან ვასაძე და ოთარ ფარცხალაძე დაასანქცირა
- 3 გაგლოევმა „ძალოვნებს“ დაავალა 4 ოქტომბრის არჩევნების წინ ე.წ. საზღვარზე სიტუაცია გააკონტროლონ
- 4 სუს-მა ძებნა გამოაცხადა ლილუაშვილის ნათესავსა და ვანში „ოცნების“ დეპუტატზე, ბიჭიკო პაიკიძეზე
- 5 გოცირიძე: ამ მასშტაბის ფულის გათეთრება ვერ ხერხდება ხელისუფლების მფარველობის გარეშე
- 6 „გამოიწვია ქონებრივი ზიანი 570 ლარის ოდენობით“ – პროკურატურამ ელენე ხოშტარიას ბრალი წარუდგინა
საგარეო და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა სხდომის დასრულების შემდეგ გამართულ პრესკონფერენციაზე განაცხადა, რომ ქართველი ხალხისთვის სიტუაცია პოზიტიური მიმართულებით არ მიდის.
„დემოკრატიები არ თრგუნავენ ოპოზიციის ხმებს და არ ზღუდავენ მედიის თავისუფლებას. ამის საპასუხოდ ჩვენ შევამცირეთ პოლიტიკური კონტაქტები და საქართველოს მთავრობის დაფინანსება.
დღეს ჩვენ შევთანხმდით დიპლომატიური პასპორტების მფლობელებისთვის უვიზო რეჟიმის შეჩერების საჭიროებაზე და კომისია წინადადებას უკვე წელს წარადგენს.
ჩვენ ასევე განვიხილეთ საქართველოს იმ ოფიციალური პირების დასანქცირება, რომლებიც მშვიდობიანი მომიტინგეების მიმართ ძალადობის უკან დგანან.
ჩვენ გავაგრძელებთ ქართველ ხალხს გვერდში დგომას, მათ შორის დაფინანსების გადამისამართებით ხელისუფლებიდან სამოქალაქო საზოგადოებისა და ქართველი ხალხისკენ, დამოუკიდებელი მედიისკენ“, - განაცხადა კალასმა.
მისივე თქმით, დიპლომატიური და სამსახურებრივი პასპორტებისთვის უვიზო რეჟიმის შეჩერებაზე ევროკომისიასთან დისკუსიის გარდა, სხდომაზე „იყო დიდი სურვილი მეტის გაკეთების“.
„ბევრმა თქვა, ვნახოთ ასევე როგორ განვითარდება მოვლენები და ჩვენ მზად ვართ დამატებითი ნაბიჯებისთვის, მაგრამ, როგორც იცით, სანქციებთან დაკავშირებით 27 ქვეყნის თანხმობაა საჭირო. სამწუხაროდ, აქამდე არ მივსულვართ, მაგრამ ვფიქრობ, რომ უვიზო რეჟიმის შეჩერება არის პირველი და ასევე, სიმბოლური ნაბიჯი“, - აღნიშნა კაია კალასმა.
საგარეო საქმეთა საბჭოს სხდომის დასრულების შემდეგ უნგრეთის საგარეო საქმეთა მინისტრმა, პიტერ სიიარტომ თქვა, რომ სლოვაკ ოფიციალურ პარტნიორთან ერთად, ვეტო დაადო საქართველოს პოლიციის ზოგიერთი მაღალჩინოსნის სანქცირებულთა სიაში შეყვანას. მან ცალმხრივი უწოდა თბილისში საპროტესტო აქციებზე მხოლოდ პოლიციის მხრიდან ძალადობის შესახებ ინფორმაციას და თქვა, რომ აქციის მონაწილეებს შორის არიან აგრესიული ელემენტებიც და პოლიციელებიც დაშავდნენ.
