სასმელების ფალსიფიცირების საქმეზე დაკავებულთა შორისაა გორელი ბიზნესმენი გიორგი კანდელაკი

ფინანსთა სამინისტროს საგამოძიებო სამსახურმა დღეს გაავრცელა ინფორმაცია, რომ შიდა ქართლის რეგიონში, წლების განმავლობაში არალეგალურად მოქმედებდა ალკოჰოლური სასმელების მწარმოებელი ქარხანა, სადაც კუსტარულად ხდებოდა სხვადასხვა დასახელების, ქართული და უცხოური, ბრენდული ალკოჰოლური სასმელების უკანონო ჩამოსხმა-რეალიზაცია.

„საგამოძიებო მოქმედებების შედეგად, ამოღებულ იქნა, სარეალიზაციოდ გამზადებული, 75 137 ბოთლი უაქციზო ალკოჰოლური სასმელი, კერძოდ, არაყი BELUGA (ბელუგა), BELVEDER (ბელვედერი), GREY GOOSE (გრეი გუსი), ვისკი BORKAN (ბორკან) და CHIVAS REGAL (ჩივას რეგალი).

ჩხრეკისას ქარხანაში ასევე აღმოვაჩინეთ ხსენებული სასმელების წარმოებისთვის განკუთვნილი დიდი რაოდენობით ბოთლები, საცობები, ეტიკეტები, შესაფუთი მასალა, ხოლო ცისტერნებში - დაახლოებით 24 ტონა ალკოჰოლური სითხე, რომლითაც ხდებოდა ზემოაღნიშნული ფალსიფიცირებული სასმელების დამზადება“, – განაცხადეს საგამოძიებო სამსახურში.

გარდა ამისა, საგამოძიებო სამსახურის თანამშრომლებმა ქარხნის მიმდებარე ტერიტორიაზე არსებული ერთ-ერთი საწყობიდან 318 000 კოლოფი უაქციზო სიგარეტი KARELIA (კარელია) და ასევე, სიგარეტის შეფუთვისათვის და წარმოებისათვის განკუთვნილი ტექნიკური დანადგარები ამოიღეს.

„ამოღებული უაქციზო ალკოჰოლური სასმელების და სიგარეტების საორიენტაციო ღირებულებამ შესაძლოა ათეულობით მილიონი შეადგინოს, რასაც საბოლოოდ საქმეზე ჩატარებული შესაბამისი ექსპერტიზა დაადგენს“, – განაცხადეს უწყებაში.

საქმეზე გამოძიება გამოძიება სისხლის სამართლის კოდექსის 196-ე და მე-200 მუხლებით მიმდინარეობს, რაც სხვისი სასაქონლო ნიშნის ან სხვა კომერციული აღნიშვნის მართლსაწინააღმდეგო გამოყენებას და მარკირებას დაქვემდებარებული აქციზური საქონლის აქციზური მარკის გარეშე გამოშვება-რეალიზაციას გულისხმობს. დანაშაულები სასჯელის სახით 7-დან 10 წლამდე ვადით თავისუფლების აღკვეთას ითვალისწინებს.