რუსული ხორბლით დატვირთული მატარებელი აზერბაიჯანისა და საქართველოს გავლით სომხეთში ჩავიდა

რუსეთის ვიცე-პრემიერის, ალექსეი ოვერჩუკის განცხადებით, ეს პირველი შემთხვევაა, სომხეთის დამოუკიდებლობის მოპოვების შემდეგ, როდესაც ორ ქვეყანას შორის პირდაპირი სარკინიგზო მიმოსვლა დამყარდა.

ოვერჩუკმა ხაზგასმით აღნიშნა, რომ ახალი მარშრუტი აძლიერებს რუსეთის სატრანსპორტო კავშირებს რეგიონის ქვეყნებთან, ზრდის „ევრაზიის ეკონომიკური კავშირის“ სხვა წევრი სახელმწიფოების წვდომას სომხეთის ბაზარზე და ასევე, სომეხი მწარმოებლებისთვის ზრდის კავშირის ბაზრებზე ხელმისაწვდომობას.

„ეს მოვლენა სამხრეთ კავკასიაში მშვიდობის დამყარებაში რეალური, ხელშესახები წვლილია, რომელიც ადასტურებს ჩვენს მუშაობას რეგიონული სტაბილურობისა და რეგიონის ყველა ქვეყნის ეკონომიკური განვითარების სასარგებლოდ“, - განაცხადა ოვერჩუკმა.

სომხეთის მთავრობის მიერ გავრცელებულ განცხადებაში ნათქვამია, რომ ტვირთების გადაზიდვაზე შეზღუდვების მოხსნა აზერბაიჯანის მხრიდან მნიშვნელოვანი ნაბიჯია რეგიონული კომუნიკაციების აღდგენისა და ეკონომიკური თანამშრომლობის განვითარების მიმართულებით.

„ეს ვაშინგტონში მიღწეული შეთანხმებების ერთ-ერთი პრაქტიკული განხორციელებაა, რაც ხელს უწყობს სომხეთსა და აზერბაიჯანს შორის დამყარებული მშვიდობის ინსტიტუციონალიზაციას.

ეს ინიციატივა განსაკუთრებით მნიშვნელოვანია ურთიერთნდობის განმტკიცებისა და მშვიდობის დღის წესრიგის ხელშეწყობის კონტექსტში“, - აცხადებს სომხეთის მთავრობა.

რუსეთის ტრანსპორტის სამინისტროს ინფორმაციით, 2026 წლის იანვრის ბოლომდე რუსეთი სომხეთში ხორბლის კიდევ 132 ვაგონს გააგზავნის ახალი მარშრუტით და შეისწავლის სხვა კატეგორიის ტვირთების ამავე გზით მიწოდების შესაძლებლობას.