„რუსთავის აზოტის“ თანამშრომლები ხელფასის ზრდის მოთხოვნით გაიფიცნენ

ერთ-ერთი გაფიცულის, დავით მეტრეველის თქმით, საწარმოს ხელმძღვანელობამ მათ ხელფასის 4%-ით მომატება შესთავაზა, რაც დასაქმებულზე დაახლოებით 40 ლარი გამოდის. ამ პირობას გაფიცულები მიუღებლად მიიჩნევენ.

„დირექციასთან სამი-ოთხი შეხვედრა გვქონდა და ყველა შეხვედრაზე შემოგვთავაზეს 4%-იანი მატება. ეს არის ხალხის დამცირება და შეურაცხყოფა. ჩვენ პროტესტს შევწყვეტთ მაშინ, როდესაც იქნება 300-ლარიანი მატება. დღეს საქმეში ჩაერთვება რუსთავის აზოტის თანამშრომლების ალტერნატიული პროფკავშირი, ცენტრალურ პროფკავშირს კი მოვუწოდებთ, არ გაბედოს აქ მოსვლა“, – უთხრა დავით მეტრეველმა ტელეკომპანია „პირველს“.

„რუსთავის აზოტში“ სულ 1900 ადამიანი მუშაობს. დავით მეტრეველის თქმით, ქარხანა გაჩერებულია და იქამდე არ ამუშავდება, სანამ მათი მოთხოვნები არ დაკმაყოფილდება.

დასაქმებულები „რუსთავის აზოტის“ ხელმძღვანელობის მხრიდან მუქარაზეც საუბრობენ. დავით მეტრეველის ინფორმაციით, გენერალურმა დირექტორმა, ჯეი პრაკაშ ჯაჯუმ მათ განუცხადა, რომ თუ მათ პირობებს არ დათანხმდებიან, ქარხანას დახურავენ და მუშახელს უფასო შვებულებაში გაუშვებენ.

„რუსთავის აზოტის“ ადმინისტრაცია, ამ ეტაპზე, მედიასთან კომენტარს არ აკეთებს. პროტესტს არ გამოხმაურებია არც რუსთავის მერი, ნინო ლაცაბიძე.

სააქციო საზოგადოება „რუსთავის აზოტი“ კავკასიის რეგიონში მინერალური სასუქებისა და ინდუსტრიული ქიმიკატების ერთ-ერთ ყველაზე მსხვილი საწარმოა. 2023 წლიდან ის სინგაპურში დაფუძნებული კორპორაციის, „ინდორამას“ ნაწილია.