რუსეთმა ჰააგის სასამართლოს პროკურორი და მოსამართლეები დაუსწრებლად გაასამართლა

სისხლის სამართლის საერთაშორისო სასამართლოს ცხრა წარმომადგენელი დამნაშავედ ცნეს რუსეთის სისხლის სამართლის კოდექსის მუხლებით, რომლებიც ეხება უდანაშაულოდ ცნობილი პირის სისხლის სამართლის პასუხისგებაში მიცემას, განზრახ უკანონო დაკავებას და საერთაშორისო ურთიერთობების გართულების მიზნით საერთაშორისო დაცვის მქონე უცხო ქვეყნის თანამდებობის პირზე თავდასხმის მომზადებას.

რუსეთის გენერალური პროკურატურის ცნობით, სისხლის სამართლის საერთაშორისო სასამართლოს პროკურორი კარიმ ხანი დამნაშავედ იქნა ცნობილი იმის გამო, რომ რუსეთის მოქალაქეების დაპატიმრების შესახებ „უკანონო ორდერების“ გამოცემა მოითხოვა. მას 15 წლით თავისუფლების აღკვეთა მიესაჯა. 3.5-დან 15 წლამდე პატიმრობა შეეფარდათ ამავე საქმეზე ბრალდებულ მოსამართლეებს.

რუსეთის საგამოძიებო კომიტეტმა ადრე განაცხადა, რომ ხანისა და სისხლის სამართლის საერთაშორისო სასამართლოს წარმომადგენლების წინააღმდეგ სისხლის სამართლის საქმე რუსეთის პრეზიდენტ ვლადიმირ პუტინისა და რუსეთის ბავშვთა უფლებების კომისრის, მარია ლვოვა-ბელოვას დაპატიმრების ორდერის გამო აღიძრა.

ჰააგაში მდებარე სისხლის სამართლის საერთაშორისო სასამართლომ პუტინისა და ლვოვა-ბელოვას დაპატიმრების ორდერი 2023 წლის მარტში გასცა. სასამართლომ განაცხადა, რომ ისინი პასუხისმგებელნი იყვნენ ომის დროს უკრაინის ოკუპირებული ტერიტორიებიდან ბავშვების უკანონო დეპორტაციასა და რუსეთში გადაყვანაში.