ყველა ბავშვს აქვს უფლება იცხოვროს უსაფრთხო გარემოში, რაც უსაფრთხო გზებსაც მოიცავს - იოსელიანი

სახალხო დამცველი მომხდარის გამო მწუხარებას გამოთქვამს და დაღუპულთა ოჯახებს თანაუგრძნობს.

„ყველა ბავშვს აქვს ფუნდამენტური უფლება, იცხოვროს უსაფრთხო გარემოში, რაც მოიცავს უსაფრთხო გზებისა და საზოგადოებრივი სივრცეების ხელმისაწვდომობას.

მოვუწოდებთ შესაბამის ორგანოებს, პრიორიტეტი მიანიჭონ საგზაო უსაფრთხოების ზომების დანერგვასა და აღსრულებას, მათ შორის შესაბამისი საგზაო ნიშნების მოწყობას, სიჩქარის შეზღუდვას და საზოგადოებრივი ცნობიერების ამაღლების კამპანიებს, რათა თავიდან ავიცილოთ მსგავსი ტრაგედიები“, - აცხადებს ლევან იოსელიანი.

30 დეკემბრის საღამოს, მარნეულისა და ბოლნისის დამაკავშირებელ ცენტრალურ გზაზე „მერსედეს-ბენცის“ მარკის მსუბუქი ავტომობილი, რომელსაც 21 წლის, სავარაუდოდ, ნასვამ მდგომარეობაში მყოფი მამაკაცი მართავდა, 16 წლის ბიჭებს დაეჯახა. ერთ-ერთი მათგანი ადგილზევე გარდაიცვალა, ხოლო მეორე - მარნეულის „ავერსის“ კლინიკაში გადაყვანის შემდეგ.

ავტოავარიას დაპირისპირება მოჰყვა. ადგილობრივები ფიზიკურად გაუსწორდნენ მძღოლს და მასთან ერთად ავტომობილში მყოფ პირებს, ამოატრიალეს სასწრაფო სამედიცინო დახმარების ავტომობილი. ისინი დამნაშავის გადაცემას და დასჯას ითხოვდნენ. ადგილზე მობილიზებული იყო პოლიცია და სპეცრაზმი. დაპირისპირების შედეგად ბოლნისის და თბილისის საავადმყოფოებში ათი ადამიანი მოხვდა.

სოფელ ნახიდურში, მარნეული-ბოლნისის ცენტრალური გზის მონაკვეთი მოუწესრიგებელია, არ არის დამონტაჟებული საგზაო ნიშნები და გარე განათება.