ოპოზიციონერ აქტივისტ გელა ხასაიას საპროცესო შეთანხმება გაუფორმდა

საპროცესო შეთანხმების საფუძველზე, ბრალდებულებს ძირითად სასჯელად 4 წელი განესაზღვრათ, საიდანაც ისინი 1 წელს საპატიმროში გაატარებენ, ხოლო 3 წელი პირობითი მსჯავრის ქვეშ იქნებიან. ვინაიდან გელა ხასაია 2025 წლის 29 სექტემბრიდან იმყოფება პატიმრობაში, მას სასჯელაღსრულების დაწესებულების დატოვება დაახლოებით 5 თვეში მოუწევს.

ხასაიას ინტერესების დამცველი, ომარ ფურცელაძე აცხადებს, რომ ბრალდების მხარეს მყარი მტკიცებულებები არ გააჩნდა, რის გამოც საპროცესო გარიგება თავადვე შესთავაზა აქტივისტს. ადვოკატი ორ მთავარ ფაქტორს გამოყოფს: სასამართლო სხდომაზე დაზარალებულის ჩვენება ფაქტობრივად „განადგურდა“, რამაც პროკურატურის პოზიცია შეასუსტა. ფურცელაძის თქმით, მეორე ბრალდებული და მისი ოჯახის წევრი გეგმავდნენ გარიგებაზე წასვლას და ხასაიას წინააღმდეგ ჩვენების მიცემას შეღავათების მისაღებად.

„გელა ხასაიას არჩევანის გაკეთება მოუწია ციხეში 5 წლის გატარებასა და საპროცესო შეთანხმებით მხოლოდ 4 თვის დარჩენას შორის“, - განმარტავს ადვოკატი.

პროკურატურის ვერსიით, 2025 წლის 1-ელ სექტემბერს თბილისში, ხასაიამ და ქერდიყოშვილმა შელაპარაკების ნიადაგზე რამაზ ჩადუნელს ფიზიკური შეურაცხყოფა მიაყენეს, რის შედეგადაც დაზარალებულმა მაჯის მოტეხილობა მიიღო.

თავად ბრალდებულები აცხადებდნენ, რომ ერთმანეთს საერთოდ არ იცნობდნენ. გელა ხასაია განმარტავდა, რომ მის წინააღმდეგ სისხლისსამართლებრივი დევნა პოლიტიკურად მოტივირებულია და მის ანტისამთავრობო აქტივობას უკავშირდება. აღსანიშნავია, რომ წინა სხდომაზე თავად დაზარალებულს, რამაზ ჩადუნელს, ბრალდებულების ამოცნობა გაუჭირდა.

გელა ხასაია ფიგურირებს BBC-ის მიერ 2025 წლის დეკემბერში გამოქვეყნებულ ჟურნალისტურ გამოძიებაში. ფილმი ეხება 2024 წლის აქციების დაშლისას საქართველოს ხელისუფლების მიერ ქიმიური ნივთიერებების გამოყენებას. ხასაია ერთ-ერთი რესპონდენტი იყო, რომელიც პოლიციის მხრიდან წყლის ჭავლისა და სხვა საშუალებების გამოყენების მძიმე გვერდით ეფექტებზე საუბრობდა.