რუსული პროპაგანდისტული მედიის (TASS) ინფორმაციით, ოკუპირებული დონეცკის ე.წ. უზენაესმა სასამართლომ საქართველოს მოქალაქეს, 37 წლის ბექა ბასილაიას, დაუსწრებლად მიუსაჯა 14 წლით თავისუფლების აღკვეთა.
ახალი ამბები
მკითხველის რჩეული
- 1 6 წელზე მეტი ასაკის ავტომობილების იმპორტი 1-ელი აპრილიდან აიკრძალება
- 2 „სფერო ჰოლდინგის“ საქმეზე კიდევ ერთი პირი, სოფიკო პეტრიაშვილი დააკავეს
- 3 18 წლის ბიჭის მკვლელობისთვის ივანე გიგლემიანს უვადო პატიმრობა მიუსაჯეს
- 4 ტელეკომპანია „იმედი“ 1000 ლარად კომპანია „პრაიმ მედია გლობალმა“ იყიდა
- 5 ირანის უზენაესი ლიდერის, აიათოლა ალი ხამენეის სიკვდილი დადასტურდა
- 6 მოზარდზე ძალადობისთვის გლდანი-ნაძალადევის პოლიციის უფროსის მოადგილე დააკავეს
ე.წ. პროკურატურის ვერსიით, ბასილაია უკრაინაში 2022 წლის მარტში ჩავიდა და „ქართულ ლეგიონს“ შეუერთდა. საოკუპაციო რეჟიმი ამტკიცებს, რომ საქართველოს მოქალაქე უკრაინის შეიარაღებული ძალების მხარეს რუსეთის ფედერაციის წინააღმდეგ 2025 წლის შემოდგომამდე იბრძოდა.
ბექა ბასილაიას ბრალად ედება ე.წ. დაქირავებულობა რუსეთის სისხლის სამართლის კოდექსის 359-ე მუხლის მიხედვით. რუსული მხარის მიერ საქართველოს მოქალაქეზე გამოცხადებულია ძებნა.
ბექა ბასილაიას შემთხვევა არ არის ერთადერთი - მოსკოვისა და ოკუპირებული დონეცკის „სასამართლოებმა“ ათობით ქართველ მებრძოლს გამოუტანეს მსგავსი განაჩენი.
„ქართული ლეგიონის“ მეთაურის, მამუკა მამულაშვილის წინააღმდეგ რუსეთში რამდენიმე სისხლის სამართლის საქმეა აღძრული. მას დაუსწრებლად პატიმრობა აქვს შეფარდებული დაქირავებულთა გადაბირებისა და ეთნიკური სიძულვილის გაღვივების ბრალდებით.
2024 წლის თებერვალში მოსკოვის სასამართლომ ლაშა რუხაიას დაუსწრებლად მიუსაჯა 13 წლით თავისუფლების აღკვეთა. ბრალდება იდენტურია - უკრაინის მხარეს შეიარაღებულ კონფლიქტში მონაწილეობა „დაქირავებულის“ სტატუსით.
ვასილ ალიბეგაშვილს და ერეკლე ამირანაშვილსაც 14 წლით თავისუფლების აღკვეთა დაუსწრებლად აქვთ მისჯილი.
რუსული პროპაგანდა ხშირად იყენებს მსგავს სასამართლო განაჩენებს უკრაინის მხარეს მებრძოლი უცხოელი მოხალისეების დისკრედიტაციისა და დაშინების მიზნით. ოფიციალური თბილისი და საერთაშორისო ორგანიზაციები ოკუპირებულ ტერიტორიებზე მოქმედი ე.წ. სასამართლოების გადაწყვეტილებებს უკანონოდ მიიჩნევენ და მათ იურიდიული ძალა არ გააჩნიათ.
