კომპანია „ნესტლეს“ (Nestle) ძირითადად ევროპის ქვეყნებიდან უკან გააქვს ჩვილ ბავშვთა კვების პროდუქტების რამდენიმე პარტია, მათ შორის SMA-ს, BEBA-ს და NAN-ის ფორმულები, გულისრევისა და ღებინების გამომწვევი ტოქსინით შესაძლო დაბინძურების გამო.
ახალი ამბები
მკითხველის რჩეული
- 1 აზიის განვითარების ბანკმა არ დააკმაყოფილა საჩივარი ხარაგაულის დამეწყრილი სოფლებიდან
- 2 კადიროვმა თქვა, რა უშლის ხელს ითუმ-კალი – შატილის გზის მშენებლობას
- 3 სასამართლომ „ლუკოილ ჯორჯიას“ მითვისებული საწვავის დაბრუნება დაავალა
- 4 პაპუაშვილი: ამ ომს ნამდვილად ჰყავს ორი დამარცხებული - უკრაინა და ევროკავშირი
- 5 Nestle-მ ჩვილ ბავშვთა საკვების ნაწილი გაყიდვებიდან ამოიღო ტოქსინის გამო
- 6 საქსტატის თანახმად, საქართველოში საშუალო ხელფასი 2271 ლარია
კომპანიის განცხადებით, არსებობს რისკი, რომ გარე მომწოდებლისგან მიღებული ნედლეული (არაქიდონის მჟავის ზეთი), რომელიც ჩვილ ბავშვთა კვების პროდუქტების წარმოებაში გამოიყენება, ცერეულიდის ტოქსინს შეიცავდა.
აღნიშნულ ტოქსინს ბაქტერია Bacillus cereus წარმოქმნის, უკიდურესად თბოსტაბილურია და მისი შემცველი საკვების მიღებამ შეიძლება გამოიწვიოს გულისრევა და ძლიერი ღებინება, ასევე კუჭის სპაზმები. როგორც წესი, ეს სიმპტომები ტოქსინთან კონტაქტიდან 30 წუთიდან 6 საათამდე პერიოდში ვლინდება.
„ნესტლეს“ პროდუქცია უკან გააქვს 30-ზე მეტი ქვეყნიდან, მათ შორისაა თურქეთი, უკრაინა, დიდი ბრიტანეთი, უნგრეთი, იტალია, გერმანია, საფრანგეთი, პოლონეთი, ავსტრია, ბელგია და ა.შ.. გარკვეული პარტიების ამოღების შესახებ განცხადება გაავრცელა რუსეთში კომპანიის წარმომადგენლობამ.
„არაქიდონის მჟავის ზეთი გამოიყენება მსოფლიოს მასშტაბით გაყიდვადი სხვადასხვა ჩვილ ბავშვთა კვების პროდუქტების ასორტიმენტში, ამიტომ ეს საკითხი გავლენას ახდენს მრავალ ქვეყანაზე, ბრენდსა და პროდუქტზე. ჩვენ კავშირში ვართ შესაბამისი ქვეყნების ხელისუფლებასთან, რათა უზრუნველვყოთ საჭირო ნაბიჯების გადადგმა“, - ნათქვამია „ნესტლეს“ განცხადებაში.
კომპანია აღნიშნავს, რომ პროდუქტებთან დაკავშირებული დაავადების არცერთი შემთხვევა არ დაფიქსირებულა.
„ნესტლეს“ ადაპტირებული რძის პროდუქტები (NAN) საქართველოშიც იყიდება. სურსათის ეროვნულ სააგენტოს მათი უკან გახმობის შესახებ ინფორმაცია არ გაუვრცელებია.
