ნაკაიძე „ქართულ ოცნებას“: საუკუნოდ ორჯონიკიძეთა გვერდით მოიხსენიება თქვენი გვარები

„მოგმართავთ ხელისუფლებას, მმართველ პარტიას, საბოლოოდ ნუ გაყიდით საქართველოს თავისუფლებასა და ევროპულ მომავალს. რუსული კანონის მიღებით ნუ გაანადგურებთ საუკუნეების განმავლობაში ჩვენი წინაპრების ღვაწლს, რომლებმაც ყველაზე სანუკვარი სიცოცხლეც გასწირეს, რათა საქართველო თავისუფალი, დამოუკიდებელი და ევროპული ოჯახის წევრი ყოფილიყო.

თუ დღეს ქვეყნის საბოლოოდ განადგურებას მოაწერთ ხელს, საუკუნოდ ორჯონიკიძეთა გვერდით მოიხსენიება თქვენი სახელი და გვარები. ნუ გააკეთებთ ამას, დადგება დრო და შეგრცხვებათ, თვალებში ჩახედოთ თქვენს შვილებსა და შვილიშვილებს“, - განაცხადა ტარიელ ნაკაიძემ.

ნაკაიძეს გამოსვლა დასრულებული არ ჰქონდა, როდესაც მასთან „ქართული ოცნების“ წევრი ალუდა ღუდუშაური მიიჭრა და მიმართა: „მე ვარ, ბიჭო? გეკითხები, ვინ არის თქო, ბიჭო. მიპასუხე, ვინ არის ორჯონიკიძე“.

ორჯონიკიძესთან შედარებაზე მწვავე რეაქცია ჰქონდათ „ქართული ოცნების“ სხვა წევრებსაც. მათ ნაკაიძე წრეში მიაქციეს, შეაგინეს და „მათხოვარი“ უწოდეს. „ზედმეტი არ მოგივიდეს შენ“, - ისმოდა მუქარაც. „ხალხის ძალის“ წარმომადგენელმა დიმიტრი ხუნდაძემ ტარიელ ნაკაიძეს ფურცლები ესროლა.

მრავალათასიანი, უწყვეტი საპროტესტო აქციებისა და საერთაშორისო პარტნიორების მოწოდებების მიუხედავად, დღეს, „ქართულმა ოცნებამ“ რუსული კანონი 84 ხმით, 30-ის წინააღმდეგ დაამტკიცა.

საკანონმდებლო ორგანოსთან აქცია მიმდინარეობს. მოქალაქეები კანონის მესამე, საბოლოო მოსმენით მიღებას შეხვდნენ შეძახილებით - „მონებო“ და „რუსებო“.

პარლამენტთან მობილიზებულია შინაგან საქმეთა სამინისტროს ასობით თანამშრომელი.