მოსწავლეზე ძალადობის გამო გათავისუფლებული მასწავლებელი 3 წელი სკოლაში ვეღარ დასაქმდება

კანონპროექტს, რომლითაც „ზოგადი განათლების შესახებ“ კანონში ეს ცვლილება შევა, „ქართული ოცნების“ პარლამენტი დაჩქარებული წესით იღებს.  ინიციატივის ავტორი განათლებისა და მეცნიერების სამინისტროა.

სამინისტროს თანახმად, მოსწავლის მიმართ ფიზიკური ძალადობა მასწავლებლის პროფესიული ეთიკისა და სკოლის შინაგანაწესის უხეშ დარღვევას წარმოადგენს და ეჭვქვეშ აყენებს მის უნარს, უსაფრთხო და მხარდამჭერი საგანმანათლებლო გარემო უზრუნველყოს.

„მსგავს შემთხვევებში მასწავლებლის/ზოგად საგანმანათლებლო დაწესებულების სხვა თანამშრომლის სასკოლო სივრცეში დაუყოვნებლივ დაბრუნება მოსწავლეთა ფიზიკური და ფსიქოლოგიური უსაფრთხოების რისკებს ქმნის და სკოლისადმი საზოგადოების ნდობაზე უარყოფითად აისახება.

3-წლიანი შეზღუდვა სადამსჯელო ღონისძიებას არ წარმოადგენს, არამედ არის პრევენციული ხასიათის მექანიზმი, რომელიც მიზნად ისახავს მსგავსი ქმედებების თავიდან აცილებას და ამავდროულად მასწავლებლისთვის ქცევის კორექციისა და პროფესიული პასუხისმგებლობის გააზრების შესაძლებლობის მიცემას.

აღნიშნული მიდგომა ხელს შეუწყობს საგანმანათლებლო სივრცეში უსაფრთხოების მაღალი სტანდარტის დამკვიდრებას, შეესაბამება საერთაშორისო პრაქტიკასა და განათლების სფეროში დამკვიდრებულ სტანდარტებს, რომლებიც ძალადობის შემთხვევებში ითვალისწინებს დროებით პროფესიულ დისკვალიფიკაციას, როგორც ბავშვის უფლებების დაცვის ეფექტიან ინსტრუმენტს“, - აცხადებს განათლებისა და მეცნიერების სამინისტრო.

არსებული კანონით, მასწავლებელს, რომელიც სკოლიდან მოსწავლის მიმართ ძალადობის ფაქტის გამო გათავისუფლდება, არ აქვს შეზღუდვა იმისა, რომ სხვა ზოგადსაგანმანათლებლო დაწესებულებაში დასაქმდეს.