მიხეილ სააკაშვილი კლინიკა „ვივამედიდან“ ციხეში დააბრუნეს

უწყების განცხადების მიხედვით, სააკაშვილის ჯანმრთელობის მდგომარეობა დამაკმაყოფილებელია და სტაციონარული მკურნალობა აღარ ესაჭიროება.

„როგორც საზოგადოებისთვის ცნობილია, მსჯავრდებული მიხეილ სააკაშვილი სტაციონარული სამედიცინო მომსახურების მიღების მიზნით 2022 წლის 12 მაისს გადაყვანილ იქნა კლინიკა „ვივამედში“, სადაც ის ამ დრომდე იმყოფებოდა და მიეწოდებოდა შესაბამისი სამედიცინო მომსახურება.

საქართველოს კანონმდებლობის შესაბამისად, სამოქალაქო სექტორის საავადმყოფოდან პაციენტის პენიტენციურ დაწესებულებაში დაბრუნება ხორციელდება მისი ჯანმრთელობის მდგომარეობის გათვალისწინებით, მკურნალი ექიმის გადაწყვეტილების საფუძველზე.

ვინაიდან მსჯავრდებულ მიხეილ სააკაშვილის ჯანმრთელობის მდგომარეობა არის დამაკმაყოფილებელი და მას აღარ ესაჭიროება სტაციონარული მკურნალობა, ის გამოწერილ იქნა სამოქალაქო სექტორის კლინიკიდან და დაბრუნდა N12 პენიტენციურ დაწესებულებაში, სადაც საერთო წესით გააგრძელებს სასჯელის მოხდას“, – ნათქვამია სპეციალური პენიტენციური სამსახურის განცხადებაში.

მიხეილ სააკაშვილი, რომელიც არაერთ სისხლის სამართლის საქმეზეა ბრალდებული და მსჯავრდებული, უკრაინიდან საქართველოში 2021 წლის თვითმმართველობის არჩევენებამდე ერთი დღით ადრე დაბრუნდა. ის 1-ელ ოქტომბერს, თბილისში დააკავეს.

სააკაშვილი აცხადებს, რომ პოლიტიკურად იდევნება და პუტინის ტყვეა. მან დაკავების დღესვე შიმშილობა გამოაცხადა და 50 დღე შიმშილობდა. ჯანმრთელობის მდგომარეობის გაუარესების გამო, ყოფილი პრეზიდენტი გორის სამხედრო ჰოსპიტალში იყო გადაყვანილი, საიდანაც ისევ ციხეში დააბრუნეს. 2022 წლის 12 მაისს, საკვების არასრულფასოვანი მიღების შედეგად ჯანმრთელობის გართულებული მდგომარეობის გამო, ის სპეციალური პენიტენციური სამსახურის კონტრაქტორ კლინიკა „ვივამედში“ მოათავსეს. ოჯახის წევრები მიხეილ სააკაშვილისთვის სასჯელის მოხდის გადავადებას და მკურნალობის მიზნით საზღვარგარეთ გადაყვანას ითხოვდნენ.

ამ თემაზე:

საზღვრის კვეთის საქმეზე სააკაშვილს სასჯელები შეუკრიბეს და 12 წელი და 6 თვე მიუსაჯეს