კუპრაშვილი: ყველა საჯარო დაწესებულებაში იარსებებს მხილების ძლიერი მექანიზმი

„ყველა საჯარო დაწესებულებაში იარსებებს მხილების ძლიერი მექანიზმი. ეს ნიშნავს, რომ, ხშირ შემთხვევაში, როდესაც მოქალაქე მიმართავს საჯარო დაწესებულებებს, არ არის დროული პასუხები ამა თუ იმ გადაწყვეტილებებთან დაკავშირებით. ეს მოქალაქეს უარყოფითად განაწყობს საჯარო სექტორის მიმართ, რაც ჩვენი დემოკრატიისთვის საფრთხის მატარებელია. მამხილებლის ინსტიტუტის გაძლიერება იქნება რეფორმა, რომელიც გამჭვირვალობას შეიტანს“, - განაცხადა კუპრაშვილმა დღეს, 24 ივლისს, საჯარო სექტორის წარმომადგენლებთან შეხვედრამდე.

მამხილლებელი შეიძლება იყოს „ნებისმიერი მოქალაქე, საჯარო დაწესებულებაში მომუშავე პირი, რომელიც ამხელს კორუფციულ ფაქტს“.

„მამხილებელი შეიძლება იყოს სრულიად ანონიმური. არ აქვს ვალდებულება, თავისი სახელი და გვარი წარმოადგინოს, ან შეიძლება, მან ღიად წარმოადგინოს პრობლემა, შეიძლება, ნაწილობრივ დავხუროთ, ვიცოდეთ ჩვენ, ანტიკორუფციულმა ბიურომ, ვინ ამხილა კონკრეტული ფაქტი და განმხილველ ორგანოს კონკრეტული ინფორმაცია არ ჰქონდეს პირის შესახებ, დავიცვათ მამხილებელი. ყველა საკითხთან დაკავშირებით შეეძლებათ, მოგვმართონ“, - განაცხადა რაჟდენ კუპრაშვილმა.

მამხილებლის „დაცვით მექანიზმებზე“ ანტიკორუფციული ბიურო მუშაობს. კუპრაშვილის განმარტებით „მამხილებელს ეკუთვნის“ დაცვითი მექანიზმები, მაგალითად, თუ ამხილა კონკრეტული თანამდებობის პირი.

„შესაძლებელია მამხილებელს გაუკეთდეს გარკვეული დაცვა, ვერ გაათავისუფლონ, არ განხორციელდეს სისხლის სამართლებრივი დევნა ამ პირის მიმართ. შესაძლოა, ეს არაკეთილსინდისიერად იყოს გამოყენებული, თვითონ გახლდეთ არაკეთილსინდისიერი და სჭირდებოდეს ამ დაცვის გამოყენება. ამიტომ, გაწერილი პროცედურები ამასაც უზრუნველყოფს“, - თქვა რაჟდენ კუპრაშვილმა.

როგორც მან აღნიშნა, მხილების დროს მტკიცების ტვირთი გადადის გამოკვლევაზე და ის მამხილებელს არ ეკისრება.