„ქართული ოცნება“ საქართველოს დემოკრატიას ძირს უთხრის – ამერიკელი სენატორების განცხადება

ისინი შეშფოთებას გამოთქვამენ საქართველოში პოლიტიკური სიტუაციის გაუარესების და „საქართველოს მთავრობის მიერ ბოლო ადგილობრივი არჩევნების შემდეგ განხორციელებული შემაშფოთებელი ქმედებების“ გამო.

„პრემიერ-მინისტრ კობახიძის გადაწყვეტილება ოპოზიციური პარტიების უკანონოდ გამოცხადებისა და მათი ლიდერების დაპატიმრების შესახებ აღმაშფოთებელი და არადემოკრატიულია. ეს კიდევ ერთი ნიშანია იმისა, რომ „ქართული ოცნება“ სრულიად არ არის დაინტერესებული ნორმალიზებული პოლიტიკური დიალოგისკენ სწრაფვით.

პოლიტიკურად მოტივირებული გამოძიებები და სამოქალაქო საზოგადოების ლიდერების, განსაკუთრებით კი მათი დაშინება, ვინც შეერთებული შტატების მთავრობასთან თანამშრომლობდა და ჩვენი კომიტეტის წინაშე ჩვენება მისცა, არის მცდელობა, ჩაახშონ განსხვავებული აზრი ქვეყანაში, რომელსაც ხელისუფლებისთვის სიმართლის თქმის საამაყო ისტორია აქვს“, - ვკითხულობთ განცხადებაში.

სენატორები მიუღებლად მიიჩნევენ შეერთებული შტატების მთავრობის ყოფილ თანამშრომლებზე „ქართული ოცნების“ თავდასხმებს უსაფუძვლო ბრალდებებით, თითქოს ისინი ძირს უთხრიან საქართველოს მთავრობას.

„მოდით, ნათლად ვთქვათ: სწორედ „ქართული ოცნება“ უთხრის ძირს საქართველოს დემოკრატიას და მის უნარს, განსაზღვროს საკუთარი მომავალი.

მივესალმებით სახელმწიფო დეპარტამენტის გადაწყვეტილებას ამ შემაშფოთებელი მოვლენების განსახილველად საქართველოს ელჩის დაბარების შესახებ და მოვუწოდებთ ტრამპის ადმინისტრაციას, განიხილოს საქართველოს მთავრობის ბოლოდროინდელი ქმედებები ორმხრივ ურთიერთობებში რაიმე ცვლილების განხორციელებამდე“, - აცხადებენ სენატორები.

ჯინ შაჰინი და ჯიმ რიში „ურყევ, ორპარტიულ მხარდაჭერას“ უცხადებენ ქართველ ხალხს.