„ქართული ოცნება“ მთავრობის თანხმობის გარეშე უცხოური გრანტის მიღების აკრძალვას აპირებს

„გრანტების შესახებ“ კანონში დაგეგმილი ცვლილებები „ქართული ოცნების“ პარლამენტის ბიუროს დღევანდელ სხდომაზე დაინიცირდა. საკანონმდებლო ცვლილებათა პაკეტი პარლამენტის ვებგვერდზე ჯერ არ არის გამოქვეყნებული.

საზოგადოებრივი მაუწყებლის ინფორმაციით, მთავრობის მიერ გრანტის გაცემის თაობაზე თანხმობის გაცხადებისთვის ათდღიანი ვადა განისაზღვრება. მთავრობის გადაწყვეტილების გასაჩივრება მის მოქმედებას არ გააჩერებს.

ცვლილებების მიხედვით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს. აკრძალული გრანტის მიღება გამოიწვევს გრანტის მიმღების დაჯარიმებას აღნიშნული გრანტის ორმაგი ოდენობით.

ამასთან, ცვლილებები გამონაკლისებსაც ითვალისწინებს. კერძოდ, მთავრობის სავალდებულო თანხმობის წესი არ გავრცელდება საერთაშორისო სპორტული ასოციაციის, ფედერაციის და კომიტეტის მიერ გრანტის გაცემაზე, საქართველოს საზღვრებს გარეთ საშუალო და უმაღლესი განათლების მიღებისთვის და სამეცნიერო მუშაობისთვის გაცემულ ინდივიდუალურ სტიპენდიაზე, ასევე საქართველოში მოქმედი საერთაშორისო ორგანიზაციის მიერ გრანტის მიღებაზე.

„ქართული ოცნება“ საკანონმდებლო ცვლილებებს დაჩქარებული წესით განიხილავს.