კადიროვმა თქვა, რა უშლის ხელს ითუმ-კალი – შატილის გზის მშენებლობას

„სინამდვილეში, საქართველო ჩვენთვის არაკეთილგანწყობილი აღმოჩნდა, მიუხედავად იმისა, რომ დოკუმენტებს ხელი მოვაწერეთ და ყველაფერი გავაკეთეთ. სამწუხაროდ, ჩვენს მეზობლებს ჯერ არ სურთ, რომ გზამ საქართველოზე გაიაროს“, – განაცხადა რამზან კადიროვმა.

საქართველოსთან დამაკავშირებელი საავტომობილო გზის მშენებლობის საჭიროებაზე ჩეჩნეთის მთავრობის თავმჯდომარემ მუსლიმ ხუჩიევმა, 2022 წლის 15 მარტს, გროზნოში გამართულ შეხვედრაზე ისაუბრა, რომელსაც ჩეჩნეთში საგანგებო ვიზიტით ჩასული რუსეთის უშიშროების საბჭოს მდივანი ნიკოლაი პატრუშევი ესწრებოდა. ხუჩიევმა აღნიშნა, რომ 41.2 კილომეტრი სიგრძის საავტომობილო გზას ითუმ-კალი - სასაზღვრო პოსტი „არღუნი“ - საქართველოს საზღვარი „ძალიან დიდი სტრატეგიული მნიშვნელობა აქვს რუსეთის ფედერაციისთვის“ და შესაძლოა, ზემო ლარსის ალტერნატივა გახდეს. მან პატრუშევს მიმართა, ამ საკითხით დაინტერესებულიყო.

საქართველოს რეგიონული განვითარებისა და ინფრასტრუქტურის სამინისტროში მაშინ განაცხადეს, რომ საქართველო არასდროს განიხილავდა და არც განიხილავს ჩეჩნეთთან დამაკავშირებელი რაიმე გზის მშენებლობას.

ჩეჩნეთის ხელისუფლებამ ითუმ-კალიდან შატილის მიმართულებით სამანქანო გზის გაჭრა 1997 წელს დაიწყო. ორ წელში გზა შატილთან მდებარე ნასოფლარამდე, ანატორამდე მიიყვანეს. 1999 წელს სამუშაოები საქართველოს ხელისუფლების მოთხოვნით შეწყდა. იმავე წელს, რუსეთ-ჩეჩნეთის მეორე ომის დაწყების შემდეგ, ჩეჩნეთიდან საქართველოში შემოსული დაახლოებით 8 ათასი ლტოლვილიდან თითქმის ნახევარმა სწორედ ამ ახალგაჭრილი სამანქანო გზით ისარგებლა.

ამ თემაზე:

რა (არ) ვიცით საქართველო-ჩეჩნეთის გზაზე და როგორ აღმოჩნდა 1000 ჰექტარი რუსეთის კონტროლქვეშ