ივანიშვილი, ღარიბაშვილი და კობახიძე „პარლამენტში დარჩენას არ აპირებენ“

„ეს ადამიანები, როგორც ჩემთვის ცნობილია და ეს არ არის, მე მგონი, დასამალი - ბიძინა ივანიშვილი, ირაკლი, ირაკლი - პარლამენტში დარჩენას არ აპირებენ. ისინი არიან ჩვენი პარტიის ხელმძღვანელები - საპატიო თავმჯდომარე, პოლიტიკური მდივანი, თავმჯდომარე და ისინი საპარლამენტო სიაში იყვნენ, როგორც ეს წესია, ფორმალურად, რეალურად და ისინი ტოვებენ საპარლამენტო მანდატებს“, - განაცხადა მდინარაძემ ჟურნალისტებთან.

ბიძინა ივანიშვილი, ირაკლი კობახიძე და ირაკლი ღარიბაშვილი „ქართული ოცნების“ საპარლამენტო სიაში პირველ სამ ადგილს ინაწილებდნენ.

დღეს, 25 ნოემბერს, „ქართულმა ოცნებამ“ მე-11 მოწვევის პარლამენტის პირველ სხდომა ჩაატარა, სადაც150-ვე წევრის უფლებამოსილება ცნო. 88 ხმით, არცერთის წინააღმდეგ, პარლამენტის თავმჯდომარედ კვლავ შალვა პაპუაშვილი აირჩიეს, ხოლო მის მოადგილეებად - გიორგი ვოლსკი, თეა წულუკიანი და ნინო წილოსანი.

სხდომამ, რომელსაც მხოლოდ „ქართული ოცნების“ წევრები ესწრებოდნენ, პარლამენტის წინ მიმდინარე საპროტესტო აქციის ფონზე ჩაიარა.

კონსტიტუციის მიხედვით, ახლად არჩეული პარლამენტის პირველ სხდომას პრეზიდენტი ნიშნავს, თუმცა სალომე ზურაბიშვილმა ეს არ გააკეთა. მან საპარლამენტო არჩევნების შედეგები და შესაბამისად, 150-ვე წევრის არჩევის კანონიერება საკონსტიტუციო სასამართლოში გაასაჩივრა.

კონსტიტუციონალისტები განმარტავენ, რომ  პარლამენტს უფლება არა ჰქონდა, ეცნო იმ პირთა უფლებამოსილება, რომელთა არჩევის კანონიერებაც საკონსტიტუციო სასამართლოშია გასაჩივრებული. ეს და პარლამენტის სხვა გადაწყვეტილებები უკანონოდ მიიჩნევა.