პარლამენტის იურიდიულ საკითხთა კომიტეტმა ე.წ. უცხოეთის აგენტების შესახებ რუსულ კანონს მესამე მოსმენით მხარი დაუჭირა. სხდომას, რომელიც ერთი წუთი გაგრძელდა, მხოლოდ უმრავლესობის და ჯგუფ „ევროპელი სოციალისტების“ წევრები ესწრებოდნენ. შეკითხვა, შენიშნვა ან მოსაზრება არავის ჰქონია.
ახალი ამბები
მკითხველის რჩეული
- 1 „რეპრესიები რეორგანიზაციის სახელით“ - თელავის უნივერსიტეტიდან 5 პროფესორი გაათავისუფლეს
- 2 თავდაცვის ყოფილი მინისტრის მოადგილე და ნათესავი დააკავეს 1.3 მლნ-ის გაფლანგვის ბრალდებით
- 3 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
- 4 ნათესავებმა თბილისში იპოვეს ჩეჩნეთიდან ოჯახში ძალადობას გამოქცეული ქალი და მისი წაყვანა სცადეს
- 5 სტრასბურგის სასამართლომ გამოაქვეყნა კითხვები მზია ამაღლობელის საქმეზე
- 6 ახობაძის ადვოკატი: ექსპერტმა დაადასტურა, რომ ნარკოტიკის შესაფუთ მასალაზე გადატანილი იყო ნერწყვი
„არაფერი უსწრაფესად... ვინმეს ჰქონდა შეკითხვა და არ მიეცა დასმის საშუალება? არ ყოფილა“, - უთხრა კომიტეტის თავმჯდომარემ, ანრი ოხანაშვილმა სხდომის შემდეგ ჟურნალისტებს.
„ქართული ოცნება“ არ დაელოდა სხდომათა დარბაზში ოპოზიციონერი დეპუტატების შესვლას, რომლებსაც საკანონმდებლო ორგანოს შენობაში პოლიცია არ უშვებდა.
„ჩვენ გარეთ დაგვაყოვნა პოლიციამ. შემდეგ ველოდებოდით პრესას, ჟურნალისტებიც არ იყვნენ შემოსულები. უმრავლესობის წევრები სკამებზეც არ ისხდნენ, როდესაც ოხანაშვილმა სხდომა უკვე დაასრულა. ეს არის არალეგიტიმური პროცესი“, - განაცხადა დეპუტატმა ხატია დეკანოიძემ.
ოპოზიციონერი დეპუტატები პარლამენტში შესვლას ჯერ კიდევ გუშინ საღამოდან ცდილობდნენ, თუმცა როგორც „ლელოს“ წევრი ანა ნაცვლიშვილი ამბობს, საკანონმდებლო ორგანოში შესვლა უკანონოდ აეკრძალათ.
„დღეს დილიდანაც იყო მიზანმიმართული პოლიტიკა, რომ ძალისა და რობოკოპების გამოყენებით შემოეყვანათ „ქართული ოცნების“ დეპუტატები და ოპოზიციონერი წევრებისთვის ხელოვნური ბარიერები შეექმნათ. მესამე მოსმენა წუთებში წყდება და სწორედ ეს წუთები დაგვაკარგინეს, როდესაც ხელოვნურად შეგვაფერხეს. მაგრამ იმ ფონზე, რაც ქვეყანაში ხდება, როდესაც ხელისუფლება აწყობს საკონსტიტუციო გადატრიალებას, მიდის ხალხის ნების წინააღმდეგ, რა თქმა უნდა, ესეც აღარ არის გასაკვირი. ეს არის სრული თვითნებობა, ზუსტად რუსული ხასიათის თვითნებობა, რომლის დასაკანონებლადაც სჭირდებათ რუსული კანონი“, - აღნიშნა ნაცვლიშვილმა.
იურიდიულ საკითხთა კომიტეტის სხდომის დაწყებამდე რამდენიმე საათით ადრე შინაგან საქმეთა სამინისტრომ პარლამენტის შესასვლელები რუსული კანონის მოწინააღმდეგეებისგან გაათავისუფლა. პოლიციამ და სპეცრაზმმა მშვიდობიანი აქციის მონაწილეების წინააღმდეგ წიწაკის სპრეი გამოიყენეს, დააკავეს რამდენიმე ადამიანიც. „ქართული ოცნების“ დეპუტატები საკანონმდებლო ორგანოში პოლიციის დახმარებით შევიდნენ და ამავე გზით დატოვეს შენობა კომიტეტის სხდომის დასრულების შემდეგ.
რუსულ კანონს პარლამენტის პლენარულ სხდომაზე მესამე, საბოლოო მოსმენით განსახილველად და კენჭისყრისთვის ხვალ, 14 მაისს გაიტანენ. „ქართულ ოცნებას“ აქვს კანონის მისაღებად საჭირო 76 ხმა.
