ირანის ისლამური რესპუბლიკის დედაქალაქში მდებარე აზერბაიჯანის საელჩოზე შეიარაღებული თავდასხმა მოხდა, რის შედეგადაც ერთი ადამიანი - დაცვის უფროსი სასიკვდილოდ დაიჭრა.
ახალი ამბები
მკითხველის რჩეული
- 1 რუსეთის 2 361 მოქალაქეს მიანიჭეს საქართველოს მოქალაქეობა 2024 წელს
- 2 თბილისის პოლიციის დეპარტამენტის დირექტორად ლაშა გოგნიაშვილი დაინიშნა
- 3 კობახიძე რუსეთის ხსენების გარეშე 9 აპრილზე პასუხისმგებლად „უცხოურ ძალას“ აცხადებს
- 4 რა წერია უცხოური გრანტების წინააღმდეგ „ქართული ოცნების“ კანონპროექტში
- 5 აქციის მონაწილეებმა რუსთაველის გამზირზე, 9 აპრილის მემორიალთან ღამე გაათენეს
- 6 ბრიტანეთმა ადამიანის უფლებების დარღვევის გამო „ოცნების“ 4 მაღალჩინოსანი დაასანქცირა
თავდასხმა დღეს, 27 იანვარს, ბაქოს დროით, დილის 8:30 საათზე მოხდა. აზერბაიჯანის საგარეო საქმეთა სამინისტროს ინფორმაციით, კალაშნიკოვის ავტომატური იარაღით შეიარაღებულმა თავდამსხმელმა დაცვის პოსტი გაარღვია და დაცვის სამსახურის უფროსი მოკლა. თავდასხმის აღკვეთისას საელჩოს დაცვის ორი თანამშრომელიც დაშავდა.
თეირანის კრიმინალურ საქმეთა ინსპექცია აცხადებს, რომ თავდამსხმელს, რომელიც უკვე დაკავებულია, პირადი მოტივი ამოძრავებდა.
„მისი თქმით, აპრილში მისი მეუღლე აზერბაიჯანის საელჩოში წავიდა და უკან აღარ დაბრუნებულა. ფიქრობდა, რომ ის ჯერ კიდევ საელჩოში იმყოფებოდა, ელჩთან შეხვედრა მოითხოვა. იმის გამო, რომ არაერთხელ უთხრეს უარი, შეტევა გადაწყვიტა“, - აცხადებენ თეირანში, თუმცა ამ ვერსიის ბაქოში არ სჯერათ.
აზერბაიჯანის პრეზიდენტმა ილჰამ ალიევმა მომხდარი, როგორც „ტერორისტული აქტი“, დაგმო: „ღრმა მწუხარებას გამოვთქვამ უფროსი ლეიტენანტის, ორჰან რიზვან ასკეროვის ოჯახისა და ახლობლების მიმართ, რომელიც საელჩოსა და მისი თანამშრომლების დაცვის უზრუნველყოფის დროს დაიღუპა. მოვითხოვთ ტერაქტის სწრაფ გამოძიებას და ტერორისტების დასჯას. დიპლომატიურ წარმომადგენლობაზე ტერორისტული თავდასხმა დაუშვებელია“, - თქვა ალიევმა.
აზერბაიჯანი მომხდარზე პასუხისმგებლობას ირანის ხელისუფლებას აკისრებს და აცხადებს, რომ მას უნდა შეესრულებინა საელჩოსა და მისი თანამშრომლების უსაფრთხოების ვალდებულება, რომელიც დიპლომატიური ურთიერთობების შესახებ ვენის კონვენციიდან გამომდინარეობს.
„ირანში ჩვენი დიპლომატიური მისიის მიმართ მუქარის მცდელობები ადრეც ყოფილა. სამწუხაროდ, ბოლო სისხლიანი ტერაქტი მეტყველებს იმაზე, თუ რა სერიოზულ შედეგებს იწვევს ამ მიმართულებით ჩვენი გადაუდებელი მოწოდებებისადმი სათანადო მგრძნობელობის არქონა. მიგვაჩნია, რომ ჩვენი ქვეყნის წინააღმდეგ ბოლოდროინდელმა ანტიაზერბაიჯანულმა კამპანიამ ირანში წაახალისა ასეთი თავდასხმები. კატეგორიულად მოვითხოვთ, რომ ირანის მიერ, რაც შეიძლება მალე გამოვლინდნენ და დაისაჯონ დამნაშავეები, ასევე, ამ სისხლიანი აქტის შემკვეთები“, - განაცხადეს საგარეო უწყებაში.
საგარეო საქმეთა სამინისტროს ინფორმაციით, თეირანიდან აზერბაიჯანში საელჩოს თანამშრომელთა ევაკუაცია მიმდინარეობს.
