ირაკლი შაიშმელაშვილის წინააღმდეგ სისხლისსამართლებრივი დევნა დაიწყო

4 ოქტომბრის საქმის ფარგლებში, გელა გელაძის თქმით, ამ დროისთვის, ჯამში, 62 ადამიანია დაკავებული, უცხოეთში მყოფი 2 პირის მიმართ კი დაწყებულია სისხლისსამართლებრივი დევნა.

„რაც შეეხება უცხოეთში მყოფ ორ პირს, რომელთა მიმართაც დაწყებულია სისხლისსამართლებრივი დევნა, მათგან ერთ-ერთი ირაკლი შაიშმელაშვილია. მას ბრალად ედება საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ მოწოდება“, – აღნიშნა გელაძემ.

ირაკლი შაიშმელაშვილმა თანამდებობიდან 2024 წლის 3 დეკემბერს, თბილისში მიმდინარე პროევროპული აქციების დარბევის ფონზე გადადგა. იმავე თვეში მან ოჯახთან ერთად საქართველო დატოვა და როგორც ცნობილია, ახლა ამერიკის შეერთებულ შტატებში იმყოფება.

2025 წლის 22 სექტემბერს, ემიგრაციაში მყოფმა ვეტერანებმა, მათ შორის ირაკლი შაიშმელაშვილმა მიმართვა გაავრცელეს და 4 ოქტომბერის აქციასთან დაკავშირებით, ძალოვანი სტრუქტურების თანამშრომლებს სისტემიდან წამოსვლისკენ მოუწოდეს.

7 ოქტომბერს, სოციალურ ქსელ Facebook-ში გამოქვეყნებულ განცხადებაში, ირაკლი შაიშმელაშვილი განმარტავდა, რომ ის „პროცესების“ მხარდამჭერი იყო და არა ორგანიზატორი. „რჩევა თუ რეკომენდაცია, რომელიც ვინმესთვის მიმიცია, იგივე არაერთხელ მაქვს საჯაროდ ნათქვამი. იატაქვეშეთში არაფერს არ ვაკეთებდი“, - წერდა შაიშმელაშვილი.