იხურება განათლების საერთაშორისო ცენტრი, რომელიც უცხოეთში სწავლას აფინანსებდა

დადგენილების თანახმად, შეიქმნება სალიკვიდაციო კომისია, რომელიც სსიპ „განათლების საერთაშორისო ცენტრის“ ლიკვიდაციას 2025 წლის 31 დეკემბრის ჩათვლით უზრუნველყოფს.

ლიკვიდირებული ცენტრის უფლებამონაცვლედ განათლების, მეცნიერებისა და ახალგაზრდობის სამინისტრო განისაზღვრება.

„განათლების საერთაშორისო ცენტრი“ 2014 წელს დაფუძნდა და ქართველ სტუდენტებს სთავაზობდა შესაძლებლობას, ესწავლათ მსოფლიოს წამყვან უნივერსიტეტებში და სასწავლო პროგრამის დასრულების შემდგომ, შეძენილი ცოდნის რეალიზება საკუთარ ქვეყანაში, საქართველოში მოეხდინათ.

2024 წელს, „განათლების საერთაშორისო ცენტრმა“ 14 საგრანტო/სასტიპენდიო პროგრამა განახორციელა და საზღვარგარეთ სწავლის მიზნით, დაფინანსება საქართველოს 210 მოქალაქეს მიანიჭა, 34 სტიპენდიანტს კი მაღალი აკადემიური მოსწრების საფუძველზე, დაფინანსება გაუგრძელა. სახელმწიფო სასწავლო გრანტების ბიუჯეტმა 5 მილიონ 200 ათასი ლარი შეადგინა.

„ცენტრი დამოუკიდებელია თავის საქმიანობაში“ - წერია სსიპ „განათლების საერთაშორისო ცენტრის“ დებულებაში.

ამჟამად ორგანიზაციის აღმასრულებელი დირექტორი ნუნუ მიცკევიჩია.