გერმანიის კანცლერი: პუტინისა და ზელენსკის შეხვედრა აშკარად არ გაიმართება

უკრაინის წინააღმდეგ რუსეთის მიმდინარე ომის საკითხი, ფრიდრიხ მერიცის თქმით, უნდა განიხილონ „იმის გათვალისწინებით, რომ პრეზიდენტ ზელენსკის და პრეზიდენტ პუტინს შორის შეხვედრა აშკარად არ გაიმართება“. როგორც კანცლერმა აღნიშნა ეს „განსხვავდება იმისგან, რაზეც პრეზიდენტი ტრამპი და პრეზიდენტი პუტინი გასულ კვირას შეთანხმდნენ“ და იმისგან, რაც ტრამპთან ვაშინგტონში შეხვედრისას განიხილეს.

18 აგვისტოს, ვაშინგტონში, უკრაინის და ევროპელი ლიდერების მონაწილეობით გამართული სამიტის დროს ტრამპი პუტინს ტელეფონით ესაუბრა, რის შემდეგაც განაცხადა, რომ დაიწყო რუსეთისა და უკრაინის პრეზიდენტებს შორის შეხვედრის მომზადება.  „ამ შეხვედრის შემდეგ, ჩვენ გვექნება სამმხრივი შეხვედრა, რომელიც ორი პრეზიდენტის და ჩემი მონაწილეობით გაიმართება“, - თქვა ტრამპმა.

კრემლს საჯაროდ არ დაუდასტურებია, რომ შეხვედრისთვის ემზადება და მხოლოდ დელეგაციების დონის ამაღლების მზადყოფნა გამოთქვა.

20 აგვისტოს ზელენსკიმ განმარტა, „თავდაპირველად ასეთი ლოგიკა არსებობდა“ - ვაშინგტონში მოლაპარაკებებიდან 7-10 დღეში უკრაინა „გაიგებდა უსაფრთხოების გარანტიების არქიტექტურას, რის შემდეგაც ის პუტინს შეხვდებოდა, თუმცა სამმხრივ ფორმატში, ანუ ტრამპის მონაწილეობით“. თუმცა, ვოლოდიმირ ზელენსკის თქმით, აშშ-ის ლიდერმა რუსეთსა და უკრაინას შორის ორმხრივი შეხვედრის შემდეგ სამმხრივი შეხვედრის ჩატარება შესთავაზა. „მე მაშინვე ვუპასუხე, ჩვენ მზად ვართ“, - თქვა უკრაინის პრეზიდენტმა.

გერმანიის კანცლერი მიიჩნევს, რომ  მოსკოვი ამ საკითხში „დროის გაყვანის სტრატეგიას“ მიმართავს და შეხვედრის შეთანხმებას გარკვეულ წინაპირობებს უკავშირებს.

ამ თემაზე:

მაკრონი მიიჩნევს, რომ ზელენსკი-პუტინის შეხვედრა ჟენევაში უნდა გაიმართოს

ზელენსკის თქმით, სამართლიანი იქნება, პუტინთან შეხვედრა ნეიტრალურ ევროპაში შედგეს