სასამართლომ აღკვეთის ღონისძიების სახით პატიმრობა შეუფარდა ოპოზიციური პარტია „გირჩი - მეტი თავისუფლების“ წევრსა და პროევროპული აქციების აქტიურ მონაწილეს, გელა ხასაიას. გადაწყვეტილება მოსამართლე ნანა შამათავამ გამოაცხადა.
ახალი ამბები
მკითხველის რჩეული
- 1 სუს-მა მცხეთა-მთიანეთის გუბერნატორის მოადგილე ქრთამის აღების ბრალდებით დააკავა
- 2 „რესი“: თბილისმა აღაიარა ის, რასაც სამხრეთ ოსეთსა და რუსეთში ამდენი წელი ელოდნენ
- 3 დიდმა ბრიტანეთმა ლევან ვასაძე და ოთარ ფარცხალაძე დაასანქცირა
- 4 სომხეთში რუსეთის მიერ ძებნილი საქართველოს მოქალაქე დააკავეს
- 5 მამულაშვილი კინოიანზე: რუსეთის იურისდიქციაში მოხვედრა სიკვდილის ტოლფასია
- 6 „ქართული ოცნების“ მხარდამჭერი მოძალადეები ზაზა მამალაძე და ირაკლი ბაუჩიძე გაათავისუფლეს
გელა ხასაია 29 სექტემბერს, ჯანმრთელობის განზრახ მსუბუქი დაზიანების ბრალდებით დააკავეს. მოგვიანებით, პროკურატურამ მას ბრალი დაუმძიმა და ედავება ჯანმრთელობის განზრახ ნაკლებად მძიმე დაზიანებას, ჯგუფურად, რაც 4-დან 6 წლამდე პატიმრობით ისჯება. ხასაიასთან ერთად დაკავებულია კიდევ ერთი პირი, ვასილ ქერდოყიშვილი.
პროკურატურის განცხადებით, „შინაგან საქმეთა სამინისტროს მიერ ჩატარებული გამოძიებით დადგინდა, რომ 1 სექტემბერს, თბილისში, თამარ მეფის გამზირის მიმდებარე ტერიტორიაზე, ბრალდებულებმა ჯგუფურად ჯანმრთელობის განზრახ დაზიანება მიაყენეს დაზარალებულს“.
გელა ხასაია ბრალს არ აღიარებს.
„აქციიდან წამოვედი დაახლოებით 22:15 საათზე, ჩავედი მეტროში და ამოვედი ჩემს სახლთან, დადიანის ქუჩაზე მდებარე მეტროსთან. შევედი მაღაზიაში. გამოვედი და დავინახე „შკოდა“. თავი ჩავღუნე და რომ ამოვიხედე, უცბად, დავინახე რამდენიმე ადამიანი. დაიწყეს ჩემი დაკავება. ვცდილობდი ტელეფონის დაბლოკვას - როგორც კი დავბლოკე, წინააღმდეგობას აღარ ვუწევდი. მათ არ განუმარტავთ, ვინ იყვნენ, რა უნდოდათ, ისე ჩამტენეს მანქანაში. მანქანაში მითხრეს, რომ პოლიციის განყოფილებიდან იყვნენ. ერთ-ერთი ვიცანი აქციებიდან. მან მითხრა: ხომ დაგპირდი სისხლით დაგიჭერთო და აგისრულეთო. არ მახსოვს ამ ადამიანის სახელი, მაგრამ გავარკვევ“, - თქვა ხასაიამ დღევანდელ სასამართლო პროცესზე.
მან დაკავების შემდეგ მის მიმართ განხორციელებულ არაადამიანურ და ღირსების შემლახავ მოპყრობაზე ისაუბრა. კეროდ, თქვა, რომ პოლიციის განყოფილებაში ჩხრეკისას ორჯერ გააშიშვლეს.
„მიხსენებდნენ მზია ამაღლობელსა და ჩემს მეგობარს, საბა სხვიტარიძეს, რომელიც ასევე რეჟიმის მსხვერპლია“, - აღნიშნა გელა ხასაიამ.
ხასაიას ადვოკატი ომარ ფურცელაძე სისხლისსამართლებრივი დევნის პოლიტიკურ მოტივებზე საუბრობს. მისი თქმით, მისი დაცვის ქვეშ მყოფი თვეების განმავლობაში იღებდა მუქარებს, რომ დააკავებდნენ.
„არ არის წარმოდგენილი არცერთი ნეიტრალური მტკიცებულება, როგორიც შეიძლებოდა ყოფილიყო ვიდეოჩანაწერი, ვიზუალური მტკიცებულებები ან რაიმე საექსპერტო კვლევა, რომელიც დაადგენდა გელა ხასაიას კავშირს მომხდარ შემთხვევასთან. მოწმეების ჩვენებებს შორის არსებითი წინააღმდეგობაა. თვითონ დაზარალებულის ჩვენების ერთი ნაწილი არსებითად და თვისობრივად ეწინააღმდეგება მეორე ნაწილს“, - განაცხადა ადვოკატმა.
საქმეზე წინასასამართლო სხდომა 20 ნოემბერს, 13:00 საათზე ჩაინიშნა.
