პაპუაშვილი დეზინფორმაციით ცდილობს ევროინტეგრაციის შეჩერების გამართლებას - ექსპერტი

გოგოლაშვილის თქმით, პაპუაშვილმა ღია ეთერში დეზინფორმაცია გაავრცელა და მოქალაქეების შეცდომაში შეყვანას ცდილობს.

„რუსეთთან და დსთ-ს ზოგიერთ ქვეყანასთან ვიზების შემოღება მოგვიწევს, მაგრამ იმას კი არ ამბობს, რომ ევროკავშირის პასპორტით შეგიძლია უვიზოდ შეხვიდე ამერიკაში, კანადაში, იაპონიაში, ავსტრალიაში, აზიის, აფრიკის, ლათინური ამერიკის თუ ოკეანიის, მსოფლიოს ქვეყნების უმეტესობაში, ჩინეთისა და შუა აზიის ქვეყნების ჩათვლით.

მან ასევე თქვა, რომ თავისუფალი ვაჭრობის რეჟიმების გაუქმება მოგვიწევს ჩინეთთან და სხვა ქვეყნებთანო, რუსეთს გულისხმობდა და არ თქვა უბრალოდ ამ დროს, რომ ევროკავშირის წევრობა თავისუფალ ვაჭრობას გაგვიხსნის თურქეთთან, იაპონიასთან, კანადასთან, ვიეტნამთან, მექსიკასთან, ჩილესთან, არგენტინასთან, ახალ ზელანდიასთან, შეგვინარჩუნებს და გააღმავებს დიდ ბრიტანეთთან, ნორვეგიასთან, შვეიცარიასთან, გაგვიხსნის ბალკანეთის ქვეყნებთან, ჩრდილო და სამხრეთ აფრიკის ქვეყნებთან და ა.შ. მომავალში აშშ-თან. მთლიანობაში ევროკავშირის სამარკო ნიშნის საქონელი ყველგან კონკურენტუნარიანია და ნებისმიერ ქვეყანაში შეღწევა არ უჭირს. მოკლედ,

ასეთი დეზინფირმაცია და მოქალაქეების შეცდომაში შეყვანა მხოლოდ ევროკავშირში გაწევრიანების შეჩერების გასამართლებლად ხდება“, - ამბობს კახა გოგოლაშვილი.

„რუსთავი 2“-თან ინტერვიუში არალეგიტიომური პარლამენტის თავმჯდომარემ, „ქართული ოცნების“ ერთ-ერთმა ლიდერმა, შალვა პაპუაშვილმა განაცხადა, ევროკავშირის წევრობა ნიშნავს სუვერენიტეტის ნაწილის და ეკონომიკური თავისუფლების დათმობას.